ພັດທະຍາ

ຈາກ ວິກິພີເດຍ

ພັດທະຍາ ຫຼື ເມືອງພັດທະຍາ (ໄທ: พัทยา ພັທຍາ) ແມ່ນເຂດປົກຄອງພິເສດເຂດໜຶ່ງໃນປະເທດໄທ ອັນຕັ້ງຕາມພະລາດຊະບັນຍັດລະບຽບບໍລິຫານລາດຊະການເມືອງພັດທະຍາ ສະບັບ ວັນທີ່ 29 ພະຈິກ ຄ.ສ. 1978 (ທຽບເທົ່າເທດສະບານນະຄອນ) ໃນເຂດຈັງຫວັດຊົນບຸລີ. ຈັດເປັນເມືອງທ່ອງທ່ຽວນານາຊາດອັນມີຊື່ສຽງລະດັບໂລກໂດຍສະເພາະຫາດຊາຍອັນທອດຍາວໄປຕາມແນວຊາຍຝັ່ງທະເລ. ຈັດໄດ້ວ່າມີຄວາມງາມອີກແຫ່ງຂອງປະເທດໄທ. ຢູ່ຫ່າງແຕ່ບາງກອກ ຫາທາງຕະເວັນອອກສຽງໃຕ້ ປະມານ 140 ກິໂລແມັດ. ຕັ້ງຢູ່ເທິງຝັ່ງທະເລທາງທິດຕະເວັນອອກຂອງອ່າວໄທ, ເຊິ່ງພັດທະຍາແບ່ງເປັນ 4 ສ່ວນໄດ້ແກ່ ພັດທະຍາເໜືອ ພັດທະຍາກາງ ພັດທະຍາໃຕ້ ແລະຫາດຈອມທຽນ.

ພັດທະຍາມີລະຫັດມາດຕະຖານຕາມ ISO 3166-2 ວ່າ TH-S.

ປະຫວັດເມືອງພັດທະຍາ[ດັດແກ້]

ເລີ່ມຮູ້ຈັກກັນຈາກຄຳບອກເລົ່າຕໍ່ກັນມາວ່າ ເມື່ອ ພ.ສ. 2310, ກ່ອນເສຍກຸງສີອະຍຸດທະຍາໃຫ້ກັບພະມ້າ 3 ເດືອນ, ພະຍາຕາກ (ສິນ), ຂະໜະນັ້ນຍັງເປັນພະຍາກຳແພງເພັດ, ລົງຄວາມເຫັນວ່າ ຫາກກຸງສີອະຍຸດທະຍາຍັງຕໍ່ສູ້ນຳພະມ້າຢ່າງອ່ອນແອເຊ່ນນີ້, ຕໍ່ໄປຈະຕ້ອງສູນເສຍເມືອງໃຫ້ພະມ້າຢ່າງແນ່ນອນ. ພະຍາກຳແພງເພັດຈິ່ງຮວບຮວມສະໝັກພັກພວກອອກໄປຕັ້ງຫຼັກໃຫມ່. ໃຫ້ມີກຳລັງທັບເຂ້ມແຂງຂຶ້ນຄ່ອຍຄືນມາກູ້ເມືອງຄືນ. ພະຍາກຳແພງເພັດໄດ້ເລີ່ມເຄື່ອນທັບອອກຈາກຄ່າຍວັດພິໄຊມຸ່ງໜ້າໄປທາງທິດຕະເວັນອອກສຽງໃຕ້ ສູ້ພ້ອມຮົ່ນຖອຍໜີການຕາມລ່າ ຂອງທະຫານພະມ້າໄປພ້ອມ ຈົນກະທັ່ງເລີຍເຂົ້າແຂວງເມືອງຊົນບຸລີ. ພະຍາກຳແພງເພັດເຊົາພັກທັບຢູ່ບໍລິເວນໜ້າວັດໃຫຍ່ອິນທາຣາມໃນປະຈຸບັນ, ແລ້ວເດີນທັບມຸ່ງກົງໄປຍັງຈັນທະບຸລີ. ລະຫວ່າງທາງໄດ້ພັກຢູ່ບ້ານໜອງໄຜ່ ຕຳບົນນາເກືອ ແຂວງເມືອງບາງລະມຸງ, ປະຈຸບັນຢູ່ທາງຫຼັງສະຖານີຕຳຫຼວດພູທອນພັດທະຍາ.

ຕາມພະລາດຊະພົງສາວະດານສະບັບພະລາດຊະຫັດຖະເລຂາເຫຼ້ມ 2 ກ່າວເອົາໄວ້ວ່າ ຂະໜະທີ່ ນາຍກົມ ເປັນນາຍຊຸມນຸມຄຸມໄພ່ພົນຢູ່ຫັ້ນ, ຕັ້ງທັບຖ້າສະກັດຄຶດຈະຕໍ່ລອງພະຍາກຳແພງເພັດໃນຕອນນັ້ນຂຶ້ນຊ້າງພາຍຖືປືນນົກສັບລາງແດງພ້ອມດ້ວຍພົນທະຫານອັນຮ່ວມເດີນທາງມາແຫ່ລ້ອມໜ້າຫຼັງ ກົງເຂົ້າໄປໃນລະຫວ່າງພວກພົນນາຍກົມມາສະກັດຢູ່, ດ້ວຍເດຊະບາລະມີບັນດານໃຫ້ນາຍກົມເກີດເກງກົວພະເດຊານຸພາບວາງອາວຸດສິ້ນ ພາພັກພວກພົນເຂົ້າຮ່ວມກອງທັບນຳພະຍາກຳແພງເພັດ. ຈາກນັ້ນພະຍາກຳແພງເພັດກໍ່ນຳທັບໄປຢຸດປະທັບຢູ່ສະຖານທີ່ອັນມີໜອງນ້ຳເທື່ອຮຸ່ງຂຶ້ນ ຫຼືວັນອັງຄານແຮມ 6 ຄ່ຳ ເດືອນຍີ່.

ນາຍກົມຈິ່ງນຳໄພ່ພົນໝື່ນໜຶ່ງນຳທັບໄປຮອດຢູ່ຕຳບົນໜຶ່ງ ແລະເຊົາພັກເສຍໜຶ່ງຄືນ. ມື້ຕໍ່ມາຈິ່ງເດີນທັບມາຮອດນາຈອມທຽນແລະທົ່ງໄກ່ເຕ້ຍ ສັດຕະຫີບ ໂດຍຢຸດພັກແຮມແຫ່ງລະຄືນ. ຕໍ່ມາຊາວບ້ານກໍ່ເອີ້ນຕຳບົນນີ້ວ່າ ທັບພະຍາ ແລະປ່ຽນມາເອີ້ນໃຫມ່ ພັດທະຍາ, ເນື່ອງຈາກເຫັນວ່າກົງບໍລິເວນອັນພະຍາຕາກມາຕັ້ງທັບນັ້ນທຳເລດີ ແລະມີລົມທະເລຊື່ ລົມພັດທະຍາ ເຊິ່ງກໍ່ແມ່ນລົມອັນພັດມາແຕ່ທິດຕະເວັນຕົກສຽງໃຕ້ຫາທິດຕະເວັນອອກສຽງເໜືອໃນຕົ້ນລະດູຝົນ, ຈິ່ງເອີ້ນສະຖານທີ່ ແຫ່ງນີ້ວ່າ ໝູ່ບ້ານພັດທະຍາ.

ອີກເຫດການສຳຄັນອັນເຮັດໃຫ້ພັດທະຍາເປັນທີ່ຮູ້ຈັກໄປທົ່ວ ເກີດຂຶ້ນເມື່ອວັນທີ່ 29 ມິຖຸນາ ພ.ສ. 2502 ເມື່ອມີລົດບັນທຸກຂະໜາດໃຫຍ່ຂອງທະຫານອະເມລິກັນປະມານ 4-5 ຄັນ, ບັນທຸກທະຫານເຕັມຄັນລົດ ປະມານຄັນລະ 100 ຄົນ ແຕ່ຈັງຫວັດນະຄອນລາດຊະສີມາ ເຊິ່ງບ່ອນຫັ້ນມີຖານທັບຂອງທະຫານອະເມລິກັນຢູ່ ມຸ່ງມາສູ່ພັດທະຍາ ແລະມາເຊົ່າບ້ານຕາກອາກາດຂອງພະຍາສຸນທອນ. ບໍລິເວນຕອນໃຕ້ຂອງຫາດ ໂດຍຜັດກັນມາພັກຜ່ອນເປັນງວດ ງວດລະສັບດາ. ຈາກພຶດຕິກຳຂອງທະຫາດອະເມລິກັນເຊ່ນນີ້, ຈິ່ງກາຍເປັນຈຸດເລີ່ມຕົ້ນການທ່ອງທ່ຽວເມືອງພັດທະຍຕອນນີ້ກະດາຍ. ຈາກສະພາບໝູ່ບ້ານຊາຍທະເລອັນງຽບສະຫງົບ ພັດປ່ຽນກັບກາຍມາເປັນສະຖານທີ່ທ່ອງທ່ຽວຕາກອາກາດ.

ໃນເວລາຕໍ່ມາ ໝູ່ບ້ານພັດທະຍາກໍ່ຖືກພັດທະນາເປັນເມືອງທ່ອງທ່ຽວຂຶ້ນຊື່ ໃນລະດັບນານາຊາດ. ເປັນທີ່ຮູ້ຈັກໄປທົ່ວທຸກມຸມໂລກ ຢ່າງເຊ່ນປະຈຸບັນ.