ໄປເບິ່ງນົກນັບພັນໂຕຢູ່ພູໂນນຫີນ
ຖ້າຫາກຈະທ່ຽວແບບຊົມທຳມະຊາດຕາມສະຖານທີ່ຕ່າງໆໃນເມືອງປາກກະດິງ ແຂວງບໍລິຄຳໄຊ ກໍ່ມີຫລາຍບ່ອນທີ່ປະທັບໃຈ ແລະ ມີອີກບ່ອນຫນຶ່ງທີ່ຢາກແນະນຳໃຫ້ໄດ້ເບິ່ງນັ້ນກໍ່ຄືພູໂນນຫີນ, ທີ່ຕັ້ງຢູ່ບ້ານໂນນ, ຖ້າເຮົາຂີ່ລົດກາຍທາງເຂົ້າຫລັກ 20 ເມືອງຄຳເກີດໄປ ປະມານ 20 ກວ່າກິໂລແມັດ ກໍ່ຈະເຫັນພູໂນນຫີນທີ່ຕັ້ງຢູ່ບ້ານດັ່ງກ່າວ ແລະ ແປະກັບສາຍທາງ ເລກທີ 13 ໃຕ້, ພູດັ່ງກ່າວມີລັກສະນະສູງເນີນ ແລະ ມີທາງຂຶ້ນຫລາຍທາງ ພ້ອມປົກຄຸມດ້ວຍປ່າໄມ້ສີຂຽວອຸ່ມທຸ່ມຕະຫລອດປີທັງເປັນບ່ອນຢູ່ຂອງຝູງນົກຫລາຍພັນໂຕອາໄສໃນພູແຫ່ງນີ້.
ພູດັ່ງກ່າວມີຕົ້ນໄມ້ໃຫຍ່ຫລາຍຊະນິດທີ່ເປັນລາຄາແພງຍັງຮັກສາໄວ້ໃຫ້ຜູ້ຄົນໄດ້ເຫັນໃນ ເມື່ອກາຍໄປ-ມາທັງເປັນປ່າຕຶບຫນາ, ເປັນບ່ອນຢູ່ອາໄສຂອງພວກສັດປ່າທຸກຊະນິດອັນທີ່ ຫລາຍກວ່າຫມູ່ກໍ່ແມ່ນຝູງນົກອ້ຽງ, ນົກແຂກ ແລະ ນົກກະຈິບທີ່ບິນເຈີດໄປ-ມາເປັນຝູງ ທັງສົ່ງສຽງຮ້ອງເປັນບົນໆ ເປັນການເຕີມສີສັນໃຫ້ປ່າສີຂຽວແຫ່ງນີ້ມີໂສມຫນ້າໃຫມ່ເຮັດໃຫ້ຜູ້ຄົນທີ່ ຜ່ານໄປ-ມາໄດ້ເຫັນຄວາມຫລາກຫລາຍຂອງສັດປີກທີ່ອາໄສໃນພູແຫ່ງນີ້, ໃນຂະນະທີ່ທ່ານຂີ່ລົດໂດຍສານ ຫລື ລົດສ່ວນຕົວຜ່ານໄປ-ມາ, ຖ້າຫາກໄດ້ຈອດລົດ ເພື່ອເຮັດກິດຈະກຳສ່ວນຕົວໃນແຄມທາງຕາມບ່ອນພູໂນນແຫ່ງນີ້ ທ່ານກໍ່ຈະໄດ້ຍິນສຽງນົກຮ້ອງຫນ້າອອນຊອນປະສານກັບສາຍລົມເຢັນໆພັດຜ່ານເຮັດໃຫ້ໄດ້ຍິນໄປທົ່ວບໍລິເວນບ້ານດັ່ງກ່າວ, ແມ່ປ້າຜູ້ຫນຶ່ງ ເຮືອນຕັ້ງແຄມທາງໃກ້ກັບພູຫນ່ວຍນີ້ເວົ້າ ສູ່ຟັງວ່າ: ຈຳພວກຝູງນົກທີ່ຫລາຍກວ່າຫມູ່ສັງເກດເຫັນໄດ້ ແມ່ນຍາມອອກພັນສາ ຈົນຮອດເດືອນ 3 ມີຝູງນົກນັບເປັນພັນໂຕມາເຕົ້າໂຮມກັນຢູ່ບ່ອນດຽວ, ສົ່ງສຽງຮ້ອງບວກກັບແມງໄມ້ ຊະນິດອື່ນໆ, ໂດຍສະເພາະແມ່ນຍາມເດືອນ 2 ຫາເດືອນ 3 ໃນຍາມນັ້ນກໍ່ເປັນຍາມຂອງແມງຈັກ ກະຈັ່ນ ແລະ ແມງອີສົ່ງສຽງຮ້ອງຕ້ອນຮັບຍາມຫນາວ, ມີແຕ່ຈຳພວກນົກມາຮ້ອງໃຫ້ຟັງຫມົດປີກໍ່ພໍແຮງແລ້ວ, ຊ້ຳຜັດມີແມງໄມ້ຊະນິດນີ້ເຂົ້າມາກໍ່ແຮ່ງຍິ່ງເພີ່ມທະວີຄວາມບົນຂຶ້ນເປັນສອງເທົ່າ, ແຕ່ທາງອົງການຈັດຕັ້ງພາຍໃນບ້ານເພິ່ນກໍ່ໄດ້ມີການຫວງຫ້າມບໍ່ໃຫ້ຄົນເຂົ້າໄປໃສ່ ແຫ້ວ ຫລື ກາງແຍງແຕ່ຢ່າງໃດ, ທັງນີ້ ກໍ່ເພື່ອເປັນການອະນຸຮັກ ສັດຈຳພວກນີ້ໃຫ້ກາຍເປັນບ່ອນຢູ່ອາໄສຂອງພວກມັນພາຍໃນພູໂນນຫີນຂອງບ້ານພວກເຮົາ.
ອາດເວົ້າໄດ້ວ່າ ພູໂນນຫີນ ທີ່ປົກຄຸມໄປດ້ວຍປ່າໄມ້ທີ່ຫລາຍໆຊະນິດນັ້ນນັບວ່າລ້ວນແຕ່ເປັນບ່ອນຢູ່ອາໄສຂອງພວກນົກທັງນັ້ນ, ບັນດາທ່ານທີ່ກາຍໄປມາໃນເຂດແຫ່ງນີ້ ກໍ່ຢ່າລືມແວ່ເບິ່ງຝູງນົກທີ່ຈັບຕາມງ່າໄມ້ຂອງເຂດພູດັ່ງກ່າວ, ບາງຄັ້ງເຮົາອາດຈະເຫັນມັນບິນກາຍໄປ ແລະ ສົ່ງສຽງເຫມືອນກັບມັນມີຄວາມສຸກທີ່ໄດ້ສົ່ງສຽງຮ້ອງຕ້ອນຮັບຜູ້ຄົນທີ່ຜ່ານໄປມາ.