ເມືອງນ້ຳບາກ

ຈາກ ວິກິພີເດຍ
Jump to navigation Jump to search

***ເມືອງ ນໍ້າບາກ***

     +ຄຳຂວັນ: ເມືອງນໍ້າບາກ ດິນແດນເຂົ້າຂາວ ຊາວເມືອງດຸໝັ່ນ ໝາກກ້ຽງຫວານ ວິລະກຳບັ້ນຮົບນໍ້າບາກທີ່ລືຊື່

   ເມືອງນໍ້າບາກ ຕັ້ງຢູ່ທິດເໜືອຂອງແຂວງຫຼວງພະບາງ, ຫ່າງຈາກເທດສະບານແຂວງ ໄປຕາມເສັ້ນທາງເລກທີ13 ເໜືອ ປະມານ 120 ກິໂລແມັດ. ມີເນື້ອທີ່ທັງໝົດ 1.700 ກວ່າກິໂລຕາແມັດ, ມີຊາຍແດນເຊື່ອມຕໍ່ກັບບັນດາເມືອງຄື: ທິດເໜືອຕິດກັບ ເມືອງຂວາ ແຂວງຜົ້ງສາລີ ແລະ ເມືອງຫຼາ ແຂວງອຸດົມໄຊ, ທິດໃຕ້ຕິດກັບ ເມືອງປາກອູ,ທິດຕາເວັນອອກຕິດກັບ ເມືອງງອຍ ແລະ ທິດຕາເວັນຕົກຕິດກັບ ເມືອງງາ ແລະ ເມືອງໄຊ ແຂວງອຸດົມໄຊ; ມີເສັ້ນທາງຫຼວງແຫ່ງຊາດ ເລກທີ13 ເໜືອ ແລະ ເລກທີ1 ຜ່ານ ແລະ ເຊື່ອມຕໍ່ກັບບັນດາແຂວງພາກເໜືອ ອອກໄປສູ່ ສາທາລະນະລັດ ສັງຄົມນິຍົມ ຫວຽດນາມ ແລະ ສາທາລະນະລັດ ປະຊາຊົນ ຈີນ; ແບ່ງອອກເປັນ 9 ກຸ່ມບ້ານ ແລະ 10ບ້ານເທດສະບານ, ປະກອບມີ 86 ບ້ານ, 13.180 ຄອບຄົວ, ມີພົນລະເມືອງທັງໝົດ 75.457 ຄົນ, ຍິງ 37.349 ຄົນ; ເຜົ່າລາວກວມ 24,70%, ກຶມມູ 50,50%, ມົ້ງ 24,80% ລະດັບຄວາມໜາແໜ້ນຂອງພົນລະເມືອງ 44,38 ຄົນຕໍ່ກິໂລຕາແມັດ

***ປະຫວັດຄວາມເປັນມາຂອງເມືອງນໍ້າບາກ***

   ເມືອງນໍ້າບາກ ໃນເມື່ອກ່ອນແມ່ນຂຶ້ນກັບເມືອງງອຍ(ຍັງບໍ່ທັນເປັນເມືອງເທື່ອ) ຂື້ນກັບແຂວງຫຼວງພະບາງ, ມາຮອດປີ1964 ຈຶ່ງໄດ້ແຍກອອກຈາກເມືອງງອຍ ມາສ້າງເປັນເມືອງອຸດົມໄຊ ຂື້ນກັບ ແຂວງອຸດົມໄຊ, ຕໍ່ມາພາຍຫຼັງສົງຄາມຢຸດຕິລົງ ທົ່ວແຜ່ນດິນລາວໄດ້ຮັບການປົດປ່ອຍ ແລະ ໄດ້ສະຖາປະນາເປັນ ສາທາລະນະລັດ ປະຊາທິປະໄຕ ປະຊາຊົນລາວ ໃນປີ1975, ເພື່ອໃຫ້ການຄຸ້ມຄອງທາງດ້ານທີ່ຕັ້ງ, ປະຊາກອນ ສະພາບພູມມີປະເທດໃຫ້ມີຄວາມສອດຄ່ອງ ເໝາະສົມ ຈຶ່ງໄດ້ແຍກເອົາ ເມືອງອຸດົມໄຊ ອອກຈາກແຂວງອຸດົມໄຊ ໃນລະຫວ່າງປີ 1989 - 1990 ມາຂື້ນກັບແຂວງຫຼວງພະບາງ ແລະ ໄດ້ຕັ້ງຊື່ເປັນ ເມືອງນໍ້າບາກ ຈົນເຖິງປັດຈຸບັນນີ້.

*********