ຫນອງນົກທະເລສາບ
ແຫລ່ງທ່ອງທ່ຽວໃນບ້ານເຮົາບໍ່ວ່າຈະຢູ່ທາງພາກເຫນືອ, ກາງ ແລະ ໃຕ້ ລ້ວນແຕ່ມີຄວາມຫລາກຫລາຍຂອງທຳມະຊາດທີ່ຫນ້າປະທັບໃຈຈົນນັບບໍ່ຖ້ວນ, ແຕ່ຍັງມີອີກແຫລ່ງທ່ອງທ່ຽວ ອີກແຫ່ງຫນຶ່ງອັນທີ່ພິເສດສຸດໆ ບໍ່ແມ່ນແຫລ່ງທ່ອງທ່ຽວທາງປະຫວັດສາດ ຫລື ວັດທະນະທຳ ແຕ່ຢ່າງໃດ, ແຕ່ມັນເປັນບ່ອນທີ່ທ່ານຈະໄດ້ຄົ້ນພົບອັນແປກໃຫມ່ ເບິ່ງຄວາມສວຍງາມຂອງມັນດ້ວຍຕົວເອງ ຈົນຜູ້ທີ່ບໍ່ເຄີຍໄດ້ ພົບເຫັນບໍ່ຫນ້າຈະເຊື່ອເລີຍວ່າ ເປັນໄປໄດ້ແນວໃດ ເພາະທະເລສາບແຫ່ງນີ້ບໍ່ໄດ້ເປັນສະຖານທີ່ເປົ່າແປນມີພຽງນ້ຳ, ແຕ່ເປັນບ່ອນຢູ່ອາໄສຂອງນົກປ່າ ແລະ ສັດນ້ຳຫລາຍຊະນິດ, ທີ່ອາໄສຫນອງແຫ່ງນີ້ຍ້ອນມີນ້ຳຂັງ ຄ້າງຢູ່ຕະຫລອດລະດູການທັງແລ້ງ ແລະ ຝົນ ຈະມີນົກປ່າ ຫລາຍພັນໂຕ ໂດຍສະເພາະເປັນນົກຍາງ, ນົກເປັດນ້ຳທີ່ຫລາຍກວ່າຫມູ່ ແລະ ນົກອື່ນໆອີກພາກັນດຳລົງຊີວິດຢູ່ໃນຫນອງນ້ຳແຫ່ງນີ້.
ທະເລສາບທີ່ກ່າວມາຂ້າງເທິງນັ້ນຕາມຄົນທ້ອງຖິ່ນແຖບ ນັ້ນເຂົາເຈົ້າມັກເອີ້ນເປັນສອງຊື່ວ່າ: ຫນອງນົກ ຫລື ທະເລສາບຂອງນົກ, ເຫດຜົນທີ່ເອີ້ນທະເລສາບນີ້ ກໍ່ຍ້ອນໃຫ້ສົມກັບ ຄວາມຍິ່ງໃຫຍ່, ຫລາກຫລາຍຂອງນົກນາໆຊະນິດທີ່ມາຈາກຫລາຍບ່ອນມາເຕົ້າໂຮມກັນຢູ່ບ່ອນນີ້ ເຊິ່ງຈະບໍ່ເຄີຍເຫັນບ່ອນໃດຫລາຍເທົ່ານີ້, ຫນອງແຫ່ງນີ້ ລັກສະນະເປັນປ່າທາມມີນ້ຳຂັງ ຕະຫລອດປີ ແລະ ເປັນບ່ອນອາໄສຂອງນົກ ແລະ ສັດນ້ຳທຸກຊະນິດຫລາຍກວ່າບ່ອນອື່ນ ເຊິ່ງຢູ່ບໍ່ໄກປານໃດໃນເຂດບ້ານສິວິໄລ ເມືອງໂທລະຄົມ ແຂວງວຽງຈັນນີ້ເອງ ຕາມປົກກະຕິແລ້ວເຄີຍໄດ້ຍິນແຕ່ຫນອງປາບໍ່ຮູ້ວ່າຫນອງນົກເປັນແນວໃດ, ຫນອງນົກເປັນສະຖານທີ່ທຳມະຊາດທີ່ເກີດຂຶ້ນເອງ ເປັນບ່ອນອາໄສນອນຢູ່ຕາມພຸ່ມໄມ້, ກົກຫນາມປາດຸກທີ່ເກີດຕາມຫນອງກາງນ້ຳ ມັນຈະເຕົ້າໂຮມກັນໃນຕອນໃກ້ຕາເວັນ ຈະຕົກດິນທັງເປັນເຂດທີ່ໄດ້ຮັບການອະນຸຮັກໄວ້ເປັນຢ່າງດີ, ເພື່ອຮັບປະກັນບໍ່ໃຫ້ມີການລ່ານົກມາເປັນອາຫານ ຫລື ເປັນສິນຄ້າໃນທ້ອງຕະຫລາດທາງພາກສ່ວນທີ່ກ່ຽວຂ້ອງໄດ້ຮັກສາສາຍພັນຂອງນົກນາໆຊະນິດໃຫ້ຂະຫຍາຍສືບພັນໄປ ຫນອງນົກທີ່ວ່ານີ້ມີເນື້ອທີ່ປະມານ 60 ເຮັກຕາ ໃນບໍລິເວນຄູກັນນ້ຳມີປາເປັນຈຳນວນ ຫລາຍພາກັນອາໄສຢູ່, ຫນອງດັ່ງກ່າວເປັນບ່ອນແພ່ພັນຂອງພວກນົກປ່າທີ່ອາໄສ ພ້ອມກັນນັ້ນ ຫນອງດັ່ງກ່າວຍັງເປັນບ່ອນແພ່ພັນຂອງສັດທີ່ດຳລົງຊີວິດທ່າມກາງດິນແດນທີ່ປຽກຊຸ່ມໄປດ້ວຍນ້ຳ, ຜູ້ຮັບຜິດຊອບປ່າທາມແຫ່ງນີ້ໃຫ້ຮູ້ວ່າ: ໃນເຂດຫນອງບ່ອນນີ້ມີນົກຍາງປະມານ 8.000 ກວ່າໂຕ, ນົກເປັດນ້ຳອີກປະມານ 2.000 ກວ່າໂຕ ແລະ ນົກປະເພດອື່ນອີກຈຳນວນຫນຶ່ງ, ຖ້າຫາກທ່ານຢາກໄປສະຖານທີ່ດັ່ງກ່າວກໍ່ບໍ່ຍາກພຽງແຕ່ເດີນທາງອອກໄປຈາກຕົວເມືອງວຽງຈັນ ມຸ່ງຫນ້າໄປຕາມຖະຫນົນເລກທີ 13 ໃຕ້ເຂົ້າສູ່ຫລັກ 12, ໃນເມື່ອກ່ອນແມ່ນຫລັກ 10 ພໍໄປຮອດໄລຍະຫນຶ່ງລ້ຽວໄປຕາມທາງເບື້ອງຂວາມືຂ້າມນ້ຳງື່ມ ໂດຍຜ່ານຂົວທ່າງ່ອນ, ມາຮອດຫລັກ 56 ລ້ຽວຊ້າຍເຂົ້າທາງດິນແດງສາຍຫນຶ່ງ (ບໍ່ມີປ້າຍບອກ) ແຕ່ມີຮ້ານອາຫານ ແລະ ໂຮງຮຽນ ຫລັງຫນຶ່ງຕັ້ງຢູ່ເບື້ອງແຈມຸມຂອງຂອບທາງເປັນສິ່ງບອກທາງແທນ, ຂີ່ລົດໄປຕາມທາງດິນແດງປະມານ 7 ກິໂລແມັດ ກໍ່ເຖິງບ້ານສີວິໄລ, ເມື່ອໄປຮອດສະຖານທີ່ນັ້ນກໍ່ສາມາດຍ່າງທ່ຽວຊົມຫນອງນົກທ່າມກາງທຳມະຊາດຂອງຟຸ່ມໄມ້ນ້ອຍ-ໃຫຍ່ຢັ່ງຢາຍ ຕາມບໍລິເວນແຄມຫນອງ, ສະຖານທີ່ດັ່ງກ່າວ ເຫມາະສຳລັບການສ້າງທີ່ພັກໂຮງແຮມນອນຄ້າງຄືນ, ເພື່ອເບິ່ງນົກຈຳນວນຫລາຍພັນໂຕບິນຕາມພູຜາປ່າໄມ້ມາພັກຢູ່ທີ່ນີ້ ໃນຍາມຕາເວັນໃກ້ຈະອັດສະດົງ.
ຫາກທ່ານສົນໃຈຢາກໄປສຳຜັດຄວນສຶກສາຂໍ້ມູນລະອຽດດ້ວຍການສອບຖາມຜູ້ນຳທ່ຽວ ພາຍໃນບ້ານກໍ່ໄດ້ ສຳລັບລະດູທີ່ເຫມາະສົມທີ່ສຸດໃນການໄປທ່ຽວເຊັ່ນນີ້ກໍ່ແນະນຳເລີຍລະດູ ແລ້ງແມ່ນດີທີ່ສຸດ, ສ່ວນລະດູຝົນທາງເຂົ້າ ອາດຈະລຳບາກແດ່ເພາະເປັນທາງດິນແດງ, ສະຫລຸບງ່າຍໆກໍ່ຄືຖ້າຫາກທ່ານຈະໄປໃນລະດູໃດກໍ່ໄດ້ເຊັ່ນກັນເພາະພາບຫມູ່ນົກປ່າຈຳນວນຫລາຍ ລ້ວນແຕ່ສ້າງຄວາມຕື່ນຕາຕື່ນໃຈໃຫ້ແກ່ຜູ້ຊົມບໍ່ຫນ້ອຍເລີຍ, ໃນຫນອງນົກກໍ່ມີນົກຫລາຍສົມຄວນຈົນໄດ້ຮັບຄວາມຍ້ອງຍໍວ່າ ສະຖານທີ່ງົດງາມຂອງທິວທັດທຳມະຊາດແຫ່ງທະເລ ສາບທີ່ເຕັມໄປດ້ວຍນົກປ່າກໍ່ວ່າໄດ້, ຖ້າໃຜໄດ້ເຫັນຮັບຮອງວ່າຖືກໃຈແນ່ນອນ.