ປ່າສະຫງວນແຫ່ງຊາດເຊບັ້ງນວນ
ປ່າສະຫງວນແຫ່ງຊາດເຊບັ້ງນວນ ແມ່ນສະຖານທີ່ທ່ອງທ່ຽວແຫ່ງຫນຶ່ງທີ່ນອນໃນຂອບເຂດ ແຂວງສາລະວັນ, ໂດຍສະເພາະແມ່ນສະຫວັນຂອງນັກທ່ອງທ່ຽວຜູ້ທີ່ມັກສຳຜັດກັບທຳມະຊາດເປັນຊີວິດຈິດໃຈດ້ວຍກິດຈະກຳການຍ່າງປ່າ.
ສະຖານທີ່ທ່ອງທ່ຽວແຫ່ງນີ້ ມີເນື້ອທີ່ທັງຫມົດເຖິງ 1,260 ກິໂລຕາແມັດ, ກວມເອົາທາງທິດຕາເວັນຕົກສຽງເຫນືອຂອງແຂວງສາລະວັນເປັນສ່ວນໃຫຍ່ ແລະອີກສ່ວນຫນຶ່ງຂອງແຂວງ ສະຫວັນນະເຂດ, ຖືກຄົ້ນພົບ ແລະ ປະກາດເປັນປ່າສະຫງວນແຫ່ງຊາດ ຢ່າງເປັນທາງການໃນວັນທີ 29 ຕຸລາ 1993, ກວມເອົາ 6 ຕົວເມືອງຄື ເມືອງສອງຄອນ, ອາດສະພັງທອງ (ສອງຕົວເມືອງນີ້ ແມ່ນຂຶ້ນກັບແຂວງສະຫວັນນະເຂດ), ເມືອງວາປີ, ສາລະວັນ, ຕຸ້ມລານ ແລະ ລະຄອນເພັງ (ແຂວງສາລະວັນ), ມີ 60 ກວ່າຫມູ່ບ້ານທີ່ມີປະຊາກອນອາໄສຢູ່ເປັນຈຳ ນວນຫລາຍ ແລະ ປະຊາຊົນສ່ວນໃຫຍ່ແມ່ນຢຶດຖືອາຊີບການເຮັດນາ, ຫາປາ ແລະ ຫາເຄື່ອງປ່າຂອງດົງ ເພື່ອສ້າງລາຍໄດ້ໃຫ້ແກ່ຄອບຄົວເນື່ອງຈາກວ່າປ່າສະຫງວນແຫ່ງຊາດດັ່ງກ່າວນີ້ ມີຄວາມອຸດົມສົມບູນອັນປະກອບດ້ວຍປ່າໄມ້ປົກຫຸ້ມຫລາຍເຖິງ 87% ໃນນັ້ນ ເປັນປະເພດປ່າດົງດິບ ກວມ 39%, ປ່າໂຄກ 21%, ປ່າປະສົມ 27% ແລະອື່ນໆອີກ 12%, ສຳລັບຈຳນວນປະຊາກອນສັດປ່າທີ່ອາໄສຢູ່ໃນເຂດປ່າສະຫງວນແຫ່ງນີ້ ປະຈຸບັນທາງພາກສ່ວນກ່ຽວຂ້ອງຍັງບໍ່ສາມາດເກັບກຳຂໍ້ມູນ ແລະສຶກສາສຳຫລວດຢ່າງລະອຽດເທື່ອແຕ່ກໍ່ມີສັດປ່າຫລາຍ ຊະນິດອາໄສຢູ່ບໍ່ວ່າຈະເປັນປະເພດສັດເລືອຄານ, ສັດປີກ, ສັດລ້ຽງລູກດ້ວຍນ້ຳນົມ ແລະ ອື່ນໆ.
ຢ່າງໃດກໍ່ຕາມ ນອກຈາກຄວາມອຸດົມສົມບູນຂອງປ່າໄມ້ ແລະ ສັດປ່າແລ້ວກໍ່ຍັງມີສາຍນ້ຳເຊບັ້ງນວນ ອັນປຽບເຫມືອນສາຍເລືອດຂອງປະຊາຊົນທີ່ອາໄສຢູ່ໃນເຂດດັ່ງກ່າວ ເມື່ອເວົ້າ ເຖິງລະບົບພູມສັນຖານກໍ່ຄື ເຂດພູມິປະເທດທີ່ຢູ່ອ້ອມຂ້າງປ່າສະຫງວນແຫ່ງຊາດເຊບັ້ງນວນກໍ່ອຸດົມສົມບູນບໍ່ວ່າຈະເປັນຫນ້າຜາທີ່ສູງຊັນ ເຊິ່ງເຫມາະສົມໃນການປີນໄຕໃຝ່ຫາປະສົບການ ຂອງບັນດານັກປີນພູທັງຫລາຍ, ຖ້າຫາກນັກທ່ອງທ່ຽວຄົນໃດສົນໃຈຢາກໄປສຳຜັດທີ່ປ່າສະຫງວນແຫ່ງນີ້ ກໍ່ສາມາດຕິດຕໍ່ສອບຖາມຂໍ້ມູນລາຍລະອຽດຕ່າງໆໄດ້ທີ່ພະແນກທ່ອງທ່ຽວແຂວງ ສາລະວັນຮັບຮອງຈະບໍ່ຜິດຫວັງ.