ນ້ຳຕົກຕາດຊະເນາະ
ນ້ຳຕົກຕາດຊະເນາະເປັນສະຖານທີ່ທ່ອງທ່ຽວອີກແຫ່ງຫນຶ່ງຂອງຫລາຍໆແຫ່ງໃນແຂວງວຽງຈັນ ທີ່ຕັ້ງຢູ່ເຂດເທດສະບານເມືອງຫີນເຫີບ ຫ່າງຈາກເສັ້ນທາງເລກທີ 13 ເຫນືອໄປປະ ມານ 20 ກວ່າກິໂລແມັດ ໄປທາງທິດເຫນືອເບື້ອງທາງທິດຕາເວັນຕົກເສັ້ນທາງເຂົ້າອອກເປັນສາຍທາງດິນແດງຄົດໂຄ້ງຕາມເນີນພູ ແລະ ຕີນພູ ເຊິ່ງໄດ້ຜ່ານບ້ານຂອງປະຊາຊົນເປັນຍ່ານໆ ກ່ອນຈະຮອດສະຖານທີ່ນັ້ນ.
ນ້ຳຕົກແຫ່ງນີ້ ມີຄວາມສູງປະມານ 80 ກວ່າແມັດ ມີລັກສະນະສູງຊັນຕົກຈາກຫນ້າຜາທີ່ເດ່ອອກມາສ່ວນໃຕ້ຜານັ້ນຈະໂກນເຂົ້າ ເບິ່ງແລ້ວຄ້າຍຄືກັນກັບຫົວງູຈົງອາງວາດໃດວາດຫນຶ່ງທຳອິດມັນຈະຕົກຈາກຈອມຜາຕົກໃສ່ຜະລານຫີນ ປະມານ 10 ແມັດ ແລ້ວໄຫລຕົກລົງມາອີກ 3 ຂັ້ນທີ່ຜ່ານຜາຫີນເປັນຊັ້ນໆ ຈາກນັ້ນມັນຈະຜ່ານພັກຜະລານຫີນນ້ອຍໃຫຍ່ລົງມາແລ້ວໄຫລໄປຕາມຮ່ອມຫີນລົງມາທາງດ້ານລຸ່ມມີບ່ອນໃຫ້ຫລິ້ນນ້ຳເພາະຜະລານຫີນໄດ້ລວມຕົວກັນເປັນອ່າງເກັບນ້ຳໄວ້ທາງດ້ານລຸ່ມກ່ອນຈະລົງຕາມສາຍຫ້ວຍອີກສາຍທາງດ້ານລຸ່ມຖັດໄປເຮົາສາມາດຂຶ້ນໄປທາງດ້ານເທິງບ່ອນນ້ຳຕົກລົງຈາກຫນ້າຜາສູ່ຜະລານຫີນທຳອິດໄດ້ເພາະເປັນຜະລານຫີນເນີນ ສ່ວນບ່ອນຫີນຊັນເຮົາຈະໄປອີກທາງ ໂດຍອາໄສຕົ້ນໄມ້ທີ່ເກີດລຽບຕາມແຄມນ້ຳຕົກທັງສອງຟາກຂ້າງເປັນໂຕຊ່ວຍ, ຖ້າຫາກເຮົາຂຶ້ນໄປຢືນຢູ່ກາງຜະລານແລ້ວ ແນມລົງມາປາກົດວ່າ ເຫັນຄົນສ່ຳແຂນນີ້ ແຫລະ, ພິເສດສຸດແມ່ນເຮົາຈະລົມກັນບໍ່ຮູ້ເລື່ອງກໍ່ຍ້ອນຄວາມແຮງຂອງນ້ຳຖອກລົງມາຈາກຫນ້າຜາກະທົບໃສ່ຫີນເຮັດໃຫ້ຫີນເຟືອນເປັນບາດໆ, ສຽງຮ້ອງຄວນຄາງຂອງຫີນນ້ອຍໃຫຍ່ດັງຢູ່ຮື່ນໆບວກກັບສຽງນົກ ແລະ ແມງໄມ້ທີ່ອາໄສຕາມທຳມະຊາດປະສານກັນກາຍເປັນສຽງດັງອອນຊອນປະດັບເອ້ໃນເຂດສາຍພູກ້ອຍແຫ່ງນີ້.
ຍ້ອນສະຖານທີ່ດັ່ງກ່າວ ປົກຄຸມໄປດ້ວຍຕົ້ນໄມ້ນ້ອຍໃຫຍ່ຫລາຍຊະນິດພະນັກງານອະນຸຮັກນ້ຳຕົກແຫ່ງນີ້ ເລົ່າສູ່ຟັງວ່າ: ນັກທ່ອງທ່ຽວເຂົ້າມາທ່ຽວໃນສະຖານທີ່ແຫ່ງນີ້ ຫລາຍກວ່າຫມູ່ຈະແມ່ນຍາມແລ້ງ ແລະ ຫລາຍເປັນພິເສດແມ່ນວັນພັກ ຫລື ງານບຸນສຳຄັນ ເພາະຈະມີລົດທົວຂົນສົ່ງນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ຽວເປັນປະຈຳ ສ່ວນຍາມຝົນກໍ່ບໍ່ຫລາຍປານໃດນັບແຕ່ໄດ້ຮັບການບູລະນະປົວແປງ ແລະ ຈັດສັນໃຫ້ສະອາດງາມຕາ ແລະ ປະດັບປາດາໂດຍຮັກສາຮູບຊົງຂອງທຳມະຊາດໄວ້ຄືເກົ່າ ເຮັດໃຫ້ນັກທ່ອງທ່ຽວໄດ້ເຂົ້າມາ ທ່ຽວຊົມນ້ຳຕົກແຫ່ງນີ້ ນັບມື້ນັບຫລາຍຂຶ້ນ ນ້ຳຕົກຕາດຊະເນາະຈະມີໄມ້ເຮ້ຍຫລາກຫລາຍສີປົກຄຸມຕາມບໍລິເວນນ້ຳຕົກກວ່າໄມ້ຊະນິດອື່ນໆ ນັບແຕ່ລານຈອດລົດລົງໄປຕາມທາງຍ່າງທັງສອງຟາກຮອດເຂດນ້ຳຕົກ ແລະ ສະຖານທີ່ພັກເຊົາ ສິ່ງສຳຄັນເຂົາເຈົ້າໄດ້ມີກະຕູບນ້ອຍທີ່ປູ ແລະ ມຸງດ້ວຍໄມ້ເຮ້ຍທັງຫມົດເປັນ 10 ກວ່າຕູບໄວ້ໃຫ້ນັກທ່ອງທ່ຽວໄດ້ພັກເຊົາຕາມອັດທະ ຍາໄສ, ເຊິ່ງເຫມາະສົມທີ່ສຸດໃນການກິນເຂົ້າປ່າ ຫລື ບໍ່ຢາກກິນກັບຕູບ ທ່ານກໍ່ສາມາດເອົາສາດໄປປູນອນ ຫລືກິນເຂົ້າ, ໂອ້ລົມກັນ, ອາດຈະເປັນການສ້າງສີສັນເລັກນ້ອຍຢູ່ເທິງຜະລານຫີນກໍ່ໄດ້ ແຕ່ກໍ່ຕ້ອງໄດ້ລະມັດລະວັງນຳອີກ, ທາງດ້ານລຸ່ມຂອງນ້ຳຕົກນອກຈາກມີອ່າງນ້ຳໄວ້ໃຫ້ອາບແລ້ວ ຍັງມີຜະລານຫີນນ້ອຍໃຫຍ່ພໍບັນຈຸຄົນໄດ້ປະມານ 8-10 ຄົນຂຶ້ນໄປ ສາຍລົມເຢັນໆໄດ້ຫອບອູ້ມເອົາອາຍນ້ຳມາສູ່ເປັນບາດໆ ຈົນຮູ້ສຶກຫນາວເຖິງແມ່ນໃນຍາມຮ້ອນປາກົດວ່າ ຮູ້ສຶກອົບອຸ່ນບວກກັບອາກາດສົດໆທີ່ທຳມະຊາດສ້າງຂຶ້ນໄຕ້ຮົ່ມປ່າໄມ້ອັນຂຽວສະອຸ້ມຕະ ຫລອດປີ ພ້ອມກັນນັ້ນ ກໍ່ຍັງມີເດີ່ນຫຍ້າ, ເດີ່ນກາງແຈ້ງເພື່ອຫລິ້ນກິດຈະກຳ ແລະ ສວນດວກໄມ້ໃຫ້ທ່ານໄດ້ທ່ຽວຊົມກັນ.[1]
- ↑ We¹