ຖ້ຳຫລວງ
ນອກຈາກຈະໄດ້ທ່ຽວ ເບິ່ງທຳມະຊາດພູຫີນປູນປ່າສະຫງວນແຫ່ງຊາດຂອງແຂວງຄຳມ່ວນ ຢ່າງເຕັມອີ່ມແລ້ວຖັດ ຈາກນັ້ນ ກໍ່ແມ່ນຖ້ຳຫລວງທີ່ເປັນຈຸດເຊື່ອມຕໍ່ກັບໂລກພາຍນອກ ລະຫວ່າງປ່າເລິກກັບເສັ້ນທາງດິນແດງແລ້ວຢາກຂໍແນະນຳໃຫ້ຂີ່ເຮືອລອດກ້ອງເບິ່ງສິ່ງມະຫັດສະຈັນພາຍໃນຖ້ຳ ແລ້ວໄປແວ່ກິນເຂົ້າປ່າຢູ່ແຄມຝັ່ງນ້ຳປະກັນຢູ່ເບື້ອງໃຕ້ຂອງຖ້ຳຫລວງ.
ຖ້ຳຫລວງ ກໍ່ແມ່ນຫນຶ່ງໃນເຂດປ່າສະຫງວນແຫ່ງຊາດທີ່ມີນ້ຳປະກັນໄຫລຜ່ານລອດກ້ອງກ່ອນນ້ຳຈະເຂົ້າລອດຕີນພູແມ່ນຈະໄຫລຜ່ານນ້ຳປະກັນອ້ອມຮອບຮ່ອມພູນ້ອຍໆ ໂດຍສະ ເພາະໃນຍາມແລ້ງໃນທາງຮ່ອມບ່ອນ ຫລັງພູທ່ານສາມາດຍ່າງໄປໄດ້ ທີ່ຢູ່ໃນເຂດຂອງບ້ານບູມລູ ເຊິ່ງຫ່າງຈາກຖ້ຳໄປປະມານ 7 ກິໂລແມັດ, ຖ້ຳຫລວງມີຄວາມຍາວລອດພື້ນພູປະມານກິໂລແມັດກວ່າໆ, ຖ້າຫາກທ່ານໄດ້ຂີ່ເຮືອພາຍລອດຖ້ຳນີ້ໃນລະດູຝົນ ທ່ານຈະສັງເກດເຫັນແມ່ນ້ຳເປັນສີຂຽວປະສານກັບແສງແດດ ເປັນບາງບ່ອນເຮັດໃຫ້ແນມເຫັນຮອດໂຕປາໃນເຂດນ້ຳຕື້ນ, ອັນທີ່ສັງເກດເຫັນໄດ້ຊັດເຈນກໍ່ແມ່ນຜາຖ້ຳຢູ່ທາງເບື້ອງເທິງເປັນລັກສະນະຫີນໂຢດລົງມາເປັນຊັ້ນໆບາງບ່ອນຍາວ, ບາງບ່ອນກໍ່ສັ້ນ ແຕ່ມີລັກສະນະລວດລາຍແຕກຕ່າງກັນໄປເປັນຮ່ອງລົງມາ, ແຕ່ຈຳພວກຫີນເຫລົ່ານັ້ນປະກອບດ້ວຍຫລາກຫລາຍສີໄດ້ເບິ່ງຈົນເລືອກບໍ່ຖືກອັນນີ້ບໍ່ແມ່ນຄົນສ້າງໄວ້ແຕ່ມັນແມ່ນທຳມະຊາດສ້າງຂຶ້ນເອງ, ແສງແດດສ່ອງຕາມປ່ອງຜາຫີນເຮັດໃຫ້ມີບາງບ່ອນແຈ້ງ, ບາງບ່ອນມືດຈົນໄດ້ໄຕ້ໄຟ. ພາຍໃນຖ້ຳຫລວງເຮົາຈະໄດ້ຍິນສຽງຂອງນົກ ແລະ ຝູງເຈຍ ເປັນບາງຄັ້ງຄາວທີ່ແຕກຕື່ນບິນພັດຜ່ານເມື່ອມັນພໍ້ຄົນອອກຈາກບ່ອນຖ້ຳແລ້ວກໍ່ມີວັງນ້ຳ ທຳມະຊາດທີ່ນ້ຳປະກັນ (ຢູ່ເບື້ອງໃຕ້ຂອງຖ້ຳຫລວງ) ເປັນສະຖານທີ່ເຫມາະສົມເພື່ອກິນເຂົ້າປ່າ ແລະ ລົງລອຍນ້ຳ.
ຈາກ ພູຫີນປູນ ໄປຫາຖ້ຳ ຫລວງກໍ່ບໍ່ໄກປານໃດ ແຕ່ຈະກັບຄືນມາທາງເລກທີ 13 ໃຕ້ກໍ່ໃຊ້ເວລາພຽງນ້ອຍດຽວ, ຖ້າຫາກຂີ່ລົດກໍ່ສາມາດພົບເຫັນສະຖານທີ່ທ່ອງທ່ຽວທີ່ຫນ້າສົນໃຈມີ ປ້າຍບອກລຽນກັນຢູ່ແຄມທາງທ່ານຈະມີໂອກາດໄດ້ພົບກັບຊາວບ້ານທີ່ຕ້ອນຮັບດ້ວຍຮອຍຍິ້ມທີ່ເປັນກັນເອງສະຖານທີ່ທ່ອງທ່ຽວທີ່ແນະນຳນີ້ທ່ານຈະເດີນທາງແບບເອກະລາດ ກໍ່ສາມາດເຂົ້າໄປໄດ້ ແຕ່ຫາກວ່າທ່ານຕ້ອງການໄປບ່ອນສອກຫລີກ ຫລື ຈະເປັນບ່ອນຜະຈົນໄພນັ້ນ ທ່ານຄວນຈະມີຜູ້ນຳພາທ່ຽວໃນທ້ອງຖິ່ນນັ້ນໄປນຳ ຫລື ຈະໃຊ້ບໍລິການຂອງບັນດາບໍລິສັດທ່ອງທ່ຽວພາຍໃນແຂວງນັ້ນກໍ່ໄດ້.