ຕື່ມ
ຄຳ : ຕື່ມ
ໃນບັນດາຄຳໃນພາສາລາວ ທີ່ບົ່ງບອກອາການຂອງຄຳນາມ, ແທນນາມ…ມີຫລາຍ ນັບບໍ່ຖ້ວນ ໃນເວລາອັນສັ້ນ ຫລື ອະທິບາຍ ໃນໜ້າເຈ້ຍນີ້. ມື້ນີ້ ຈຶ່ງຂໍສືບຕໍ່ສະເໜີຄຳ: ຕື່ມທີ່ພວກເຮົາໃຊ້ຫລາຍ ໃນການຄົບຄ້າສະມາຄົມ ທຸກອາຊີບ, ເປັນຄຳທີ່ເຂົ້າໃຈງ່າຍ ແລະ ມີຄວາມໝາຍເລິກເຊິ່ງ, ຄົບຖ້ວນໃນຕົວຂອງມັນ, ແຕ່ເຖິງປານນັ້ນ ບາງຄັ້ງກໍ່ມັກພົບເຫັນ ຫລື ຍິນການໃຊ້ຄຳອື່ນ ມາຕື່ມໃສ່ເລີຍກາຍເປັນ ຄຳເຫລືອໂດຍບໍ່ຈຳເປັນ.
ຄຳ: ຕື່ມ, ຕາມພົດຈະນານຸກົມ ພາສາລາວຫລາຍສະບັບ ຂຽນໄວ້ວ່າເປັນຄຳກຳມະ ເຊິ່ງມີຄວາມໝາຍວ່າເປັນຄຳທີ່ບອກອາການ ຂອງຄຳນາມ, ແທນນາມ…ອາດຈະເປັນອາການໃຊ້ມື ຄືການເອົາວັດຖຸສິ່ງຂອງໃດໜຶ່ງ ເພື່ອໃຫ້ອີກວັດຖຸສິ່ງຂອງໜຶ່ງມີຈຳນວນ ຫລື ປະລິມານຫລາຍຂຶ້ນກວ່າເກົ່າ ຫລືບໍ່ໃຫ້ຂາດ, ຫລຸດ… ຫລືການໃຊ້ວາຈາປາກ/ເວົ້າ (ຂະຫຍາຍກຳມະດ້ວຍກັນ) ແລະ ອື່ນໆ ເຊັ່ນມີບາງປະໂຫຍກວ່າ: ທ້າວແດງຕື່ມສີໃສ່ຮູບແຕ້ມຂອງລາວ ໃຫ້ມັນສົດໃສຂຶ້ນ; ທ້າວ…ຕື່ມຄວາມໃສ່ຮ້າຍປ້າຍສີນາງ…; ຖ້າເຈົ້າບໍ່ເຂົ້າໃຈບົດຮຽນ ຂໍ້ນີ້ຄວນຖາມຕື່ມດັ່ງນີ້ເປັນຕົ້ນ. ໃນກໍລະນີຄຳນີ້ ເຮັດໜ້າທີ່ຂະຫຍາຍ ຄຳນາມ ຫລື ກຳມະດ້ວຍກັນ ໃນປະໂຫຍກ ຫລື ຈະເປັນກຳມະວະວີ ກໍ່ແລ້ວແຕ່, ຄວນໃຊ້ຄຳຄຸນນາມມາຕໍ່ທ້າຍ ເພື່ອໃຫ້ໄດ້ຄວາມໝາຍເລິກເຊິ່ງ, ເຊັ່ນ: ເຈົ້າຄວນຖາມຕື່ມອີກ ຖ້າບໍ່ເຂົ້າໃຈ; ທ່ານຢາກໄດ້ຫຍັງຕື່ມອີກບໍ່? ທ່ານຄວນເອົາປາແດກຕື່ມໃສ່ອີກ ເພື່ອໃຫ້ແກງແຊບຂຶ້ນ ດັ່ງນີ້ເປັນຕົ້ນ. ໃນປະກົດການຕົວຈິງພວກເຮົາພົບເຫັນ ແລະ ໄດ້ຍິນການໃຊ້ຄຳ: "ເພີ່ມຕື່ມ" ເຊິ່ງຄວາມໝາຍການສື່ແມ່ນອັນດຽວກັນ, ຄືມັກພົບ: ສອບຖາມຂໍ້ມູນເພີ່ມຕື່ມໄດ້ທີ່…ໃນປະໂຫຍກແບບນີ້ຖ້າໃຊ້ວ່າ…ສອບຖາມຂໍ້ມູນຕື່ມໄດ້ທີ່…ກໍ່ມີຄວາມໝາຍຄົບຖ້ວນແລ້ວ ຫລື ອີງຕາມອາຈານ ດ້ານພາສາລາວສະໄໝໃໝ່ ໃຫ້ຂໍ້ຄິດມາ ກໍ່ຄື ໃຊ້ຄຳ: ເພີ່ມເຕີມກໍ່ໄດ້. ໃນພົດຈະນານນຸກົມພາສາລາວຂອງທ່ານ ດຣ. ທອງຄຳ ອ່ອນມະນີສອນ (ພິມປີ 2008) ກໍ່ໄດ້ຂຽນບັນຈຸຄຳ: "ເຕີມ ເປັນກຳມະ" ມີຄຳທີ່ມີຄວາມໝາຍ, ໃຊ້ຮ່ວມກັນໄດ້ ໃນກຸ່ມຄຳນີ້: ຕື່ມ, ແຖມ, ເພີ່ມເຂົ້າ.....
ໃນພາສາລາວເຮົາ ມີມາກມາຍຫລາຍຄຳ ທີ່ສາມາດໃຊ້ແທນຄວາມໝາຍກັນໄດ້, ອີງຕາມແຕ່ລະກໍລະນີໄປ ເຊິ່ງກໍ່ຄ້າຍ ຄືກັນກັບພາສາຊາດອື່ນໆ, ຍ້ອນວ່າມັນໄດ້ຜ່ານຂະບວນການກັ່ນຕອງ ແລະ ຂະຫຍາຍຕົວໄປຕາມຈັງຫວະ ການຂະຫຍາຍຕົວຂອງສະພາບ ເສດຖະກິດ-ສັງຄົມນັ້ນໆ. ມີຫລາຍຄຳ ເກີດຂຶ້ນໃໝ່ກໍ່ແມ່ນ ເພື່ອຮັບໃຊ້ຄວາມຮຽກຮ້ອງຕ້ອງການ ຂອງຍຸກສະໄໝ, ມີບາງຄຳກໍ່ກາຍເປັນຄຳເກົ່າ ທີ່ບໍ່ຄ່ອຍຖືກນຳມາໃຊ້, ແຕ່ມັນກໍ່ຍັງຄົງໄວ້ ໃນຄັງສາງວັດຈະນານຸກົມ ທີ່ພ້ອມອອກມາຮັບໃຊ້ທຸກເວລາ, ແຕ່ດີແທ້ຄຳໃດທີ່ເຮົາ ມີແລ້ວກໍ່ຄວນໃຊ້ ແລະ ບໍ່ຄວນນຳເອົາຄຳພາສາອື່ນ ທີ່ມີຄວາມໝາຍ ກະຈາມາໃຊ້ນັ້ນລະດີ.