ຂີ່ຊີບລາຍ ສາຍພູດົງຫົວສາວ ເມືອງປາກຊ່ອງ
ບໍລິສັດທ່ອງທ່ຽວກຣີນ ດິດສະໂກເວີຣີ (Green discovery) ໄດ້ເປີດຈຸດທ່ອງທ່ຽວຜະຈົນໄພໃນຮູບແບບໃຫມ່ທີ່ເຂດສາຍພູດົງຫົວສາວທີ່ຢູ່ໃກ້ກັບເມືອງປາກເຊ ນັ້ນກໍ່ຄືການຂີ່ຊີບ ລາຍ (Zip-Line) ຈາກຟາກຫນຶ່ງໄປຫາອີກຟາກຫນຶ່ງນັ້ນເອງ ນັບວ່າເປັນວິທີການທ່ອງທ່ຽວອີກແບບຫນຶ່ງທີ່ສ້າງຄວາມປະທັບໃຈນັກທ່ອງທ່ຽວທີ່ມັກໃນສິ່ງທ້າທາຍແບບບໍ່ເຄີຍມີມາກ່ອນໃນເຂດນີ້ທັງເປັນການສ້າງຄວາມສົນໃຈໃຫ້ນັກທ່ອງທ່ຽວເຂົ້າມາທ່ຽວໃນບ່ອນນີ້ໃຫ້ຫລາຍຂຶ້ນເລື້ອຍໆ.
ຖ້າຫາກມາຮອດບ່ອນທີ່ເພິ່ນກະກຽມໄວ້ແລ້ວກໍ່ຈະໄດ້ພົບກັບຄວາມຕື່ນເຕັ້ນນັ້ນກໍ່ຄືຈະໄດ້ຂີ່ເຊືອກສາຍຊີບລາຍ ພ້ອມສຳຜັດດ້ວຍຕົນເອງ ເມື່ອເຫັນທຳອິດທ່ານອາດຈະຮູ້ສຶກຕົກໃຈຢ່າງໃຈຫາຍໃຈຂ້ວມກັບຄວາມສູງຂອງມັນ ຕົ້ນໄມ້ໃຫຍ່ສູງຊັນສີຂຽວອຸ່ມທຸ່ມທາງດ້ານລຸ່ມເປັນຕົວຊີ້ວັດເພາະທ່ານຈະໄດ້ຜ່ານປາຍໄມ້ເຫລົ່ານັ້ນໄປ ແຕ່ກໍ່ບໍ່ເປັນຫຍັງເພາະວ່າສາຍລວດນັ້ນຮັບປະກັນຢ່າງເຕັມທີ່ຢູ່ແລ້ວ ເມື່ອທ່ານໃສ່ຊຸດຮຽບຮ້ອຍແລ້ວກໍ່ກະໂດດລົງຈະຜ່ານຮ່ອມພູທີ່ສູງຊັນວົນໄປວຽນມາຈາກຂ້າງນີ້ໄປຫາຂ້າງນັ້ນ ນັບວ່າເປັນການຜະຈົນໄພທີ່ສຽວທີ່ສຸດພໍໄປຮອດຕໍ່ຫນ້າຂອງນ້ຳຕົກດົງຫົວສາວທ່ານຮູ້ສຶກຫນາວ ເພາະອາຍນ້ຳມັນຟົ້ງອອກມາເປັນບາດໆ, ນອກນັ້ນຈະເຫັນພາບທິວທັດຂອງຮຸ້ງກິນນ້ຳ ແລະ ສຽງນ້ຳຕົກຄ້າຍຄືກັນກັບຟ້າຮ້ອງທ່ານ ຈະຮູ້ສຶກມ່ວນຊື່ນກັບທິວທັດທຳມະຊາດບວກກັບຜູ້ເຝົ້າຄອຍເບິ່ງແຍງຂອງຜູ້ນຳທ່ຽວທີ່ຊຳນານງານຢ່າງຮອບຄອບ.
ເຮົາເດີນທາງໄປບ່ອນນັ້ນກໍ່ບໍ່ໄກຈາກຕົວເມືອງປາກເຊ ຫລາຍປານໃດ ພຽງຂີ່ລົດໄປ ທາງເຂດພູພຽງບໍລິເວນ ເຂດກາເຟບ່ອນທີ່ມີຊື່ສຽງທາງພາກໃຕ້ ໃນເມື່ອກ່ອນເຂດນີ້ເປັນເຂດພູ ໄຟເກົ່າ ແຕ່ໃນປະຈຸບັນໄດ້ກາຍເປັນເຂດປູກກາເຟສ້າງລາຍໄດ້ ເປັນກອບເປັນກຳຂອງແຂວງຈຳປາສັກ, ຫົວລົດເລີ່ມຕັ້ງຫນ້າຂຶ້ນຕາມເນີນພູຂຶ້ນບໍ່ຮອດ 50 ກິໂລແມັດຊ້ຳ, ເກືອບໄປຮອດເມືອງປາກຊ່ອງແລ້ວລ້ຽວຂວາລົງຕາມທາງດິນແດງເຂົ້າຫາບ້ານຫນອງຫລວງ ພ້ອມກັບໄດ້ເຫັນຫມູ່ບ້ານຂອງປະຊາຊົນລາວລຸ່ມທີ່ຕັ້ງລຽບຕາມແຄມສາຍທາງເຂົ້ານັ້ນ ແລະ ກໍ່ມີຜູ້ນຳ ທ່ຽວລໍຖ້າ, ກ່ອນຈະເຂົ້າປ່າຜູ້ນຳທ່ຽວໄດ້ແນະນຳໃຫ້ຮູ້ກ່ອນລ່ວງຫນ້າ ແລະ ຕ້ອງກຽມອຸປະກອນທີ່ຈຳເປັນ, ຕ້ອງປອດໄພໄວ້ກ່ອນ ສ່ວນການເດີນທາງຈະໄດ້ຂຶ້ນໂນນພູຜ່ານສວນຜັກຕ້ອງກຽມອຸປະກອນທີ່ຈຳເປັນ, ຕ້ອງປອດໄພໄວ້ກ່ອນ ສ່ວນການເດີນທາງຈະໄດ້ຂຶ້ນໂນນພູຜ່ານສວນຜັກ ແລະ ປ່າກາເຟທີ່ຖືກບົວລະບັດເປັນຢ່າງດີຂອງຊາວສວນໃນເຂດນັ້ນ, ນອກຈາກນັ້ນ ຍັງຈະໄດ້ພົບກັບນ້ຳຕົກຕາດ, ຜາຊັນ, ປ່າຕຶບຫນາ ແລະ ຊີວະນາໆພັນຢ່າງເຕັມອີ່ມ.