ສົງຄາມໂລກຄັ້ງທີສອງ

ຈາກ ວິກິພີເດຍ

ສົງຄາມໂລກຄັ້ງທີສອງ (ອັງກິດ: World War II ມັກຫຍໍ້ເປັນ WWII ຫຼື WW2, ຝະລັ່ງ: Seconde Guerre mondiale) ເປັນຄວາມຂັດແຍ້ງທາງທະຫານລະດັບໂລກຕັ້ງແຕ່ ຄ.ສ. 1939 ຫາ 1945 ເຊິ່ງກ່ຽວຂ້ອງກັບປະເທດສ່ວນໃຫຍ່ໃນໂລກ ລວມທັງລັດມະຫາອຳນາດທັງໝົດ. ປະເທດຜູ້ຮ່ວມສົງຄາມລວມໂຕກັນເປັນພັນທະມິດທາງທະຫານຄູ່ສົງຄາມສອງຝ່າຍ ແມ່ນ ຝ່າຍສັມພັນທະມິດແລະຝ່າຍອັກສະ. ລະຫວ່າງສົງຄາມມີການລະດົມທະຫານກວ່າ 100 ລ້ານຄົນ ດ້ວຍລັກສະນະຂອງ "ສົງຄາມເບັດເສັດ". ປະເທດຜູ້ຮ່ວມສົງຄາມຫຼັກໄດ້ທຸ່ມເທຂີດຄວາມສາມາດທາງເສຖະກິດ ອຸດສາຫະກຳແລະວິທະຍາສາດເພື່ອຄວາມພະຍາຍາມຂອງສົງຄາມທັງໝົດ ໂດຍລຶບເສັ້ນຂີດແບ່ງລະຫວ່ງຊັບພະຍາກອນຂອງພົນເຮືອນຫຼືທະຫານ. ປະເມີນກັນວ່າສົງຄາມມີມູນຄ່າປະມານ 1 ລ້ານລ້ານໂດລາສະຫະລັດ ດ້ວຍປະການທັງປວງ. ສົງຄາມໂລກຄັ້ງທີສອງຈຶ່ງນັບວ່າແມ່ນສົງຄາມຂະໜາດໃຫຍ່ທີ່ສຸດ ໃຊ້ເງິນທຶນຫຼາຍທີ່ສຸດ ແລະນອງເລືອດທີ່ສຸດໃນປະຫວັດສາດມະນຸສະຍະຊາດ, ປະເມີນກັນວ່າມີຜູ້ເສຍຊີວິດລະຫວ່າງ 40 ຫາຫຼາຍກວ່າ 70 ລ້ານຄົນ.