ດອນລົບປາດີ
ດອນລົບປາດີ ເປັນດອນໃຫຍ່ລະດັບສາມ ຂອງບັນດາດອນທີ່ຢູ່ໃນຍ່ານຂອງມະຫານະທີສີທັນດອນ ເຂດອ່າງແມ່ນ້ຳຂອງຕອນໃຕ້ ແລະ ຢູ່ເທິງຄັນເຫວຄອນພະເພັງ ລົບປາດີ ປະກອບມີ 7 ບ້ານ ທີ່ຕັ້ງລຽງລາຍແຕ່ຫົວດອນຈົນເຖິງຫາງດອນ ລຽບຕາມລຳນ້ຳຂອງທັງຕາເວັນອອກ ແລະ ຕາເວັນຕົກຂອງດອນ ແຕ່ລະບ້ານມີວັດຄົບທຸກບ້ານ ແລະ ຊື່ບ້ານກໍໃສ່ລົບປາດີໝົດ ເຊັ່ນ: ລົບປາດີຫົວດອນ ລົບປາດີກາງ ລົບປາດີໂພນທັນ ລົບປາດີຈົກ ລົບປາດີຄອນນ້ອຍ ແລະ ອື່ນໆ ສ່ວນໂຮງຮຽນກໍໂຮມກັນຕາມຈຸດພິເສດ ແລະ ຈຳນວນຂອງນັກຮຽນ ອາຊີບຫຼັກຂອງຄົນທ້ອງຖິ່ນນີ້ ແມ່ນການປູກຝັງລ້ຽງສັດເປັນອາຊີບຕົ້ນຕໍ ຕາມບັນພະບູລຸດທີ່ເຄີຍທຳມາຫຼາຍເສັ່ນຄົນ ແລະ ອາຊີບສຳຮອງ ກໍຄົງເປັນການຫາປາຕາມລຳນ້ຳຂອງ.
ການຫາປາຕາມລຳນ້ຳຂອງ ແຕ່ກ່ອນໆນັ້ນ ສ້າງລາຍຮັບຢ່າງເປັນກອບເປັນກຳ ສາມາດຂາຍປາສົດໆ ຂາຍປາທີ່ແປຮູບເປັນອາຫານ ເຊັ່ນ: ປາແດກ ປາຈາວ ປາເຄັມ ປາແຫ້ງ ແລະ ອື່ນໆ ສູ່ຕະຫຼາດຕ່າງໆຕາມການສະເໜີ ແຕ່ມາບັດນີ້ ສະພາບດັ່ງກ່າວມີການປ່ຽນແປງໄປ ອັນເນື່ອງມາຈາກການສະເໜີ ຫຼືຄວາມຕ້ອງການມີຫຼາຍ ແຕ່ການສະໜອງພັດນ້ອຍ ຫາປາໄດ້ນ້ອຍ ຍ້ອນສະພາບແວດລ້ອມນ້ຳຂອງບໍ່ສະໝ່ຳສະເໝີ ຄົນຫາປາມີຫຼາຍ ແລະ ຄົນຫາປາແບບດັບສູນຈຳນວນໜຶ່ງ ທຳລາຍການຂະຫຍາຍຕົວຂອງສັດນ້ຳ ບໍ່ສະເພາະແຕ່ພາຍໃນກໍຄືປະເທດຕ່າງໆ ທີ່ທຳການຫາປາຢູ່ນ້ຳຂອງ