ບ້ານແກ້ວສໍາພັນ

ຈາກ ວິກິພີເດຍ
Jump to navigation Jump to search

ບ້ານແກ້ວສໍາພັນ (Ban Keosamphanh) ຕັ້ງຢູ່ເມືອງປາເຊ, ແຂວງຈໍາປາສັກ, ສປປ ລາວ. ຖືກສ້າງຕັ້ງຂຶ້ນໃນປີ 1996 ໂດຍລັດໄດ້ທອດໂຮມເອົາສ່ວນໜຶ່ງຂອງ ບ້ານແກ, ບ້ານໂພນສະອາດ ແລະ ບ້ານໂນນດູ່ ມາຕັ້ງເປັນບ້ານໃໝ່ ເຊິ່ງນັ້ນກໍ່ເປັນສາຍເຫດທີ່ບ້ານໄດ້ຖືກຕັ້ງຊື່ວ່າ ແກ້ວສໍາພັນ, ແລະ ບ້ານນີ້ກໍ່ເປັນໃຈກາງເຊື່ອມຕໍ່ໃຫ້ 3 ບ້ານດັ່ງກ່າວ.

ບ້ານແກ້ວສໍາພັນມີເນື້ອທີ່ທັງໝົດ 4 ກມ2, ມີທິດເໜືອຕິດກັບ ບ້ານແກ, ທິດຕາເວັນອອກຕິດກັບ ບ້ານໂນນດູ່, ທິດໃຕ້ຕິດກັບເສັ້ນທາງເລກທີ 13 ກົງກັນຂ້າມກັບ ບ້ານໂພນສະຫວັນ, ແລະ ທິດຕາເວັນຕົກຕິດກັບ ບ້ານໂພນສະອາດ ແລະ ສະໜາມກິລາກາງແຂວງຈໍາປາສັກ. ບ້ານຕັ້ງຫ່າງຈາກໃຈກາງເມືອງປາກເຊປະມານ 2 ກມ ແລະ ຈາກ ຕະຫຼາດດາວເຮືອງ 1 ກມ.

ບ້ານແກ້ວສໍາພັນມີປະຊາກອນທັງໝົດ 2640 ຄົນ ຫຼື 552 ຫຼັງເຮືອນ, ມີຕະຫຼາດແລງຫຼັກ 2 ເຊິ່ງເປັນຕະຫຼາດທີ່ເກົ່າແກ່ທີ່ສຸດໃນເມືອງປາເຊ, ໂຮງຮຽນມັດທະຍົມໂພນສະອາດ ເຊິ່ງຍ້າຍຈາກບ້ານໂພນສະອາດ ແລະ ມາຕັ້ງໃໝ່ໃນປີ 2008, ມີໂຮງຮຽນປະຖົມສົມບູນແກ້ວສໍາພັນ, ມິວັດແກ້ວສໍາພັນວະນາຣາມ ເຊິ່ງເປັນວັດທີສ້າງຕັ້ງຂຶ້ນດ້ວຍຄວາມຮ່ວມແຮງຮ່ວມໃຈ ແລະ ທຶນຮອນຂອງຄົນພາຍໃນບ້ານເອງ ໂດຍມີເຈົ້າສັດທາພໍ່ເຖົ້າເກດເປັນຜູ້ໃຫ້ທານ ທີ່ດິນໜຶ່ງຕອນສໍາລັບຕັ້ງວັດ.

ຈຸດເດັ່ນຂອງບ້ານນີ້ແມ່ນມີທິວທັດທົ່ງນາທີ່ສວຍງາມ, ໃນບ້ານຍັງມີຮ່ອງຮອຍຂອງຄ້າຍທະຫານຝຣັ່ງຕັ້ງແຕ່ສະໄໝເປັນຫົວເມືອງຂຶ້ນ.

ຈຸດຄ້າຍທະຫານນີ້ເອງທີ່ເປັນອາຖັນທີ່ຮູ້ກັນດີຂອງຄົນພາຍໃນບ້ານ ເພາະໄດ້ມີເສດຖີຄົນໜຶ່ງ ໄດ້ພະຍາຍາມຕັ້ງເຮືອນວິນລາ 2 ຊັ້ນ ແຕ່ວ່າ ບໍ່ສໍາເລັດເພາະວ່າ ມີກໍາມະກອນ 2 ຄົນໄດ້ເສຍຊີວິດໃນລະຫວ່າງການກໍ່ສ້າງ. ຄົນທໍາອິດຕາຍຍ້ອນຕົກຈາກຊັ້ນ 2 ແລ້ວ ຄໍຫັກຕາຍ, ແລະ ຄົນທີ 2 ຕາຍຍ້ອນຜິດກັບເພື່ອນກໍາມະກອນເຮັດວຽກນໍາກັນ ແລ້ວຂ້າກັນຕາຍໃນເຮືອນຫຼັງນັ້ນ. ເສດຖີຄົນນັ້ນ ເລີຍຕັດສຶນໃຈຂາຍເຮືອນທີ່ຍັງບໍ່ທັນແລ້ວນັ້ນໃຫ້ຄົນອື່ນມາສືບຕໍ່. ຜູ້ທີ່ຍ້າຍເຂົ້າມາໃໝ່ກໍ່ໄດ້ສືບຕໍ່ກໍ່ສ້າງຈົນສໍາເລັດ ແລະ ໄດ້ນິມົນຄູບາອາຈານມາສູດໄລ່ສິ່ງຊົ່ວຮ້າຍ. ແຕ່ເຈົ້າຂອງຄົນໃໝ່ກໍ່ຢູ່ບໍ່ໄດ້ດົນຍ້ອນມີສິ່ງລົບກວດ ມັກເຮັດໃຫ້ຄອບຄົວຜິດກັນ ແລະ ມີເລື່ອງຕົບຕີກັນຕະຫຼອດ. ເຈົ້າຂອງຄົນໃໝ່ນີ້ເລີຍຕັດສິນໃຈຂາຍໃຫ້ຄົນອື່ນຕໍ່. ຄອບຄົວໃໝ່ເຂົ້າມາຢູ່ໄດ້ປະມານ 4 ເດືອນໃນ ປີ 2002 ແຕ່ກໍ່ຢູ່ບໍ່ໄຫວ ຕັດສິນໃຈຍ້າຍອອກ ປະກາດຂາຍເຮືອນຫຼັງດັ່ງກ່າວ ແຕ່ກໍ່ຍັງບໍ່ທັນມີຄົນມາຊື້ຈົນຮອດປະຈຸບັນ.