ວັງວຽງ

ຈາກ ວິກິພີເດຍ

ວັງ​ວຽງ ກຸ້ຍ​ຫິຼນ​ແຫ່ງ​ເມືອງລາວ

(City of Party)

ກຸ້ຍ​ຫຼິນ​ເມືອງ​ລາວ​ ຄື​ຄຳ​ນິຍາມ​ອັນ​ງົດ​ງາມ​ທີ່​ບໍ່​ເກີນ​ກວ່າ​ຄວາມ​ເປັນ​ຈິງ​ຂອງ​​ເມືອງ​ນ້ອຍໆ ທີ່​​ໂອບອ້ອມ​ດ້ວຍ​ພູ​ຜາ ​ແລະ ​ສາຍ​ນ້ຳ​ແຫ່ງ​ນີ້. ວັງ​ວຽງໜຶ່ງ​ໃນ​ເມືອງ​ທ່ອງ​ທ່ຽວ​ຍອດ​ນິຍົມ​ຂອງ​ລາວ ​​ໄກ​ຈາກ​ນະຄອນຫຼວງວຽງ​ຈັນ​ໄປ​ທາງ​ທິດ​ເໜືອປະມານ 160 ກມ ​ແລະ​​ ໃຊ້​ເວລາ​​ເດີນ​ທາງ​ປະມານ 3 ຊົ່ວ​ໂມງ, ​ເຖິງ​ແມ່ນ​ວ່າ​ວັງ​ວຽງ​ຈະ​​ເປັນ​ພຽງ​ເມືອງ​ນ້ອຍໆ ຢູ່​ກາງ​ປ່າ​ເຂົາ​ລຳ​ເນ​ົາ​ໄພ ​ແຕ່​ໃນ​ດ້ານ​ການ​ທ່ອງ​ທ່ຽວ ​ເມືອງ​ວັງ​ວຽງ​ຖື​​ໄດ້​ວ່າ​ມີ​ຊື່​ສຽງ​ໂດ່​ງດັງ​ແລະ​ ເປັນ​ທີ່​ຮູ້​ຈັກ​ບໍ່​ນ້ອຍ​ໄປ​ກວ່າ​ເມືອງ​ອື່ນ​ໃນ​ລາວ​ເລີຍ.

ດ້ວຍ​ພູມສັນຖານ ​ແລະ ​ບັນຍາກາດ​ຂອງ​ເມືອງ​ວັງ​ວຽງ ​ທີ່​ໂອ​ບອ້ອມ​ໄປ​ດ້ວຍ​ພູ​ຜາ​​ ແລະ​ ສາຍ​ນ້ຳ ​ເຮັດ​ໃຫ້​ວັງ​ວຽງ​ຖືກ​ຍ້ອງ​ຍໍ​ໃຫ້​ຄ້າຍ​ຄື​ ເມືອງ​ກຸ້ຍ​ຫຼິນຂອງ​ປະ​ເທດ​ຈີນ ​ໂດຍ​ສະ​ເພາະ​ໃນ​ຕອນ​ເຊົ້າທີ່​ສາຍ​ໝອກລອຍ​ພາດ​ຜ່ານຂຸນ​ເຂົາ​ ແລະ ​​ແມ່ນ້ຳຊອງອັນ​ກວ້າງ​ໃຫຍ່ ຖ້າ​ທ່ານ​ຜູ້​ອ່ານ​ໄດ້​ພັກ​ແຄມ​ນ້ຳ ຕ້ອງ​ຢ່າ​ພາດ​ໃນ​ການ​ຕື່ນ​ແຕ່​ເຊົ້າ​ເພື່ອ​ຊົມ​ຈັກ​ເທື່ອໜຶ່ງ ​ເຊິ່ງ​​ເປັນ​ເລື່ອງ​ແ​ປກ​ແຕ່​ມີ​ຈິງ​ທີ່​ເມືອງ​ວັງ​ວຽງ​ຍັງ​ມີ​ຄູ່​ແຝດ​ທີ່​ມີ​ພູມ​ສັນຖານ​ ແລະ ​ບັນຍາກາດ​ຄ້າຍ​ຄື​ເມືອງ​ກຸ້ຍ​ຫຼິນ​​.

ປັດຈຸບັນ​ເມືອງ​ວັງ​ວຽງ​ ໄດ້​ເປີດ​ຕົວ​ເປັນ​ສະຖານ​ທີ່​ຍອດ​ນິຍົມ ​ຂອງ​ບັນດາ​ນັກ​ທ່ອງທ່ຽວແບັກ​ແພັກ​ເກີ້ຢ່າງ​ເຕັມ​ໂຕ ດ້ວຍ​ກິດຈະ​ກຳ​ອັນ​ຫຼາກຫຼາຍຂອງ​ເມືອງ​ວັງ​ວຽງ ທີ່​ສ່ວນ​ຫຼາຍ​ແລ້ວ​ແມ່ນ​ຮອງ​ຮັບ​ນັກ​ທ່ອງ​ທ່ຽວ​ເຊີງ​ພະຈົນ​ໄພ ບໍ່​ວ່າ​ຈະ​ເປັນ​ພາຍ​ຄາ​ຍັກ, ຂີ່​ກົງ​ເບັງ, ປິນ​ໄຕ່​ທ່ຽວ​ຖ້ຳງາມ ​ເປັນຕົ້ນ ​ແຕ່​ສຳລັບ​ຄົນ​ມັກ​ນອນ​ເອນ​ກາຍ ອີ່​ມ​ເອີ​ບ​ໄປ​ດ້ວຍ​ບັນຍາກາດ ​ແລະ ​ທຳ​ມະ​ຊາດ ​ເມືອງ​ວັງ​ວຽງ​ເປັນ​ດັ່ງ​ສະຫວັນບົນ​ດິນ​ຂອງ​ທ່ານ.

ລ່ອງ​ນ້ຳຊອງດ້ວຍ​​ເຮືອຄາ​ຍັກ ຈຸດ​ເດັ່ນ​ ​ແມ່ນ້ຳຊອງ​ອາດ​ຈະ​ບໍ່​ມີ​ຄວາມ​ຍິ່ງ​​ໃຫຍ່​ ແລະ ​ເປັນ​ທີ່​ຮູ້​ຈັກ​ດີ​ຂອງ​ຜູ້​ຄົນ​ທົ່ວ​ໄປ ຖ້າ​ທຽບ​ກັບ​ແມ່ນ້ຳຂອງ ​ແຕ່​ສຳລັບ​ນັກ​ພະຈົນ​ໄພ ​ທີ່​ມັກ​ຮັກ​ໃນ​ກາ​ນລ່ອງ​ແກ້ງ ສາຍ​ນ້ຳຊອງ​ແຫ່ງ​ນີ້ອາດ​ຈະ​ເປັນ​ສາຍ​ນ້ຳ​ແຫ່ງ​ສະ​ເໜ່​ ແລະ ​ເປັນ​ທີ່​ຊື່ນ​ຊອບຫຼາຍກວ່າ​ສາຍ​ນ້ຳອື່ນໆ ​ໃນ​ປະ​ເທດ​ລາວ ​ເພາະ​ສາຍ​ນ້ຳຊອງ​ເປັນ​ພຽງ​ສາຍ​ນ້ຳພຽງ​ແຫ່ງ​ດຽວ​ໃນ​ປະ​ເທດ​ລາວ ທີ່​ມີ​ບໍລິການ​ລ່ອງ​ແກ້ງ​ຢ່າງ​ຄົບ​ວົງ​ຈອນ​ ນັກ​ເດີນ​ທາງ​ແບບ​ແບັກ​ແພັກ​ເກີ້ຈຳ​ນວນ​ບໍ່ໜ້ອຍ ​ເລືອກ​ວັງ​ວຽງ​ ເປັນ​ເມືອງ​ທ່ອງທ່ຽວ​ອັນ​ດັບໜຶ່ງ ຫຼາຍກວ່າ​ວຽງ​ຈັນ ​ຫຼື ຫຼວງພະ​ບາງ​​ເສຍອີກ ​ເພາະ​ເມືອງ​ນ້ອຍໆ​ ກາງ​ຂຸນ​ເຂົາ​ແຫ່ງ​ນີ້ ພວກ​ເຂົາ​ຈະ​ຮັບ​ທັງ​ຄວາມ​ສະໜຸກສະໜານ ຄວາມ​ຕື່ນ​ເຕັ້ນປະ​ທັບ​ໃຈ ​ແລະ ​ຊື່ນ​ຊອບ​ທຳ​ມະ​ຊາດ​ອັນ​ສວຍ​ງາມ​ຂອງ​ກຸ້ຍ​ຫຼິນ​ແຫ່ງ​​ເມືອງ​ລາວ ​ທີ່​ມີ​ໃຫ້​ໄດ້​ສຳ​ຜັດ​ຕະຫຼອດໝົດທັງ​ປີ.

ກິດຈະ​ກຳ​ການ​ລ່ອງ​ຄາ​ຍັກ​ເທິງ​ແມ່ນ້ຳຊອງ ທ່ານ​ສາມາດ​ຕິດ​ຕໍ່​ ຂໍ​ໃຊ້​ບໍລິການ​ໄດ້​ຈາກ​ເຄົາ​ເຕີ​ທົວພາຍ​ໃນຕົວ​ເມືອງ​ວັງ​ວຽງ​ທີ່​ມີ​ໃຫ້​ເລືອກ​ຫຼວງຫຼາຍ ຈາກ​ນັ້ນ​ເລືອກ​ຊ່ວງ​ເວລາ​ທີ່​ຈະ​ໄປ​ເລິ່ມຕົ້ນການ​ລ່ອງ ​ໂດຍ​ກິດຈະ​ກຳ​ລ່ອງ​ຄາ​ຍັກ​​ເທິງ​ແມ່ນ້ຳຊອງຈະ​ໃຊ້​ເວລາ​ປະ​ມານ 4-6 ຊົ່ວ​ໂມງ ​ເຊິ່ງ​ຖ້າ​ໄປ​ລ່ອງ​ໃນ​ຊ່ວງ​ລະດູ​ແລ້ງ​ນີ້ຈະ​ໃຊ້​ເວລາ​ອ່າວ​ດົນ​ກວ່າ ​ແຕ່​ສຳລັບ​ລະດູ​ຝົນ​ການ​ລ່ອງ​ຄາ​ຍັກ​ແມ່ນ​ຈະ​ມີ​ທັງ​ຄວາມ​ໄວ​ ແລະ ​ຄວາມ​ແຮງ ​ເຊິ່ງຈະ​ມ່ວນ​ທີ່​ສຸດ​ເລີຍ.

​ເມື່ອ​ທ່ານ​ເລືອກ​ຊ່ວງ​ເວລາ​ໄດ້​ແລ້ວ ​ຜູ້ນຳທ່ຽວຈະ​ພາ​ໄປ​ຫາ​ຈຸດ​ເລິ່ມຕົ້ນການ​ລ່ອງ ​ເຊິ່ງສ່ວນ​ຫຼາຍຈະ​ເລິ່ມທີ່​ບໍລິ​ເວນ​ຜາຕັ້ງ ນັບ​ເປັນ​ສັນຍະ​ລັກ​ຂອງ​ກິດຈະ​ກຳ​ລ່ອງ​ຄາ​ຍັກ​ກໍ​ວ່າ​ໄດ້ ​ແຕ່​ຖ້າ​ທ່ານ​ໄປ​ລ່ອງ​ໃນ​ລະດູ​ແລ້ງ​ ຄື​ແນວ​ນີ້ ​ຜູ້ນຳທ່ຽວ ຈະ​ປ່ຽນ​ຈຸ​ເລິ່ມຕົ້ນ​ໄປ​ທີ່​ບໍລິ​ເວນ​ບ້ານ​ວຽງ​ສະ​ໄໝ​ແທນ ​ກ່ອນ​ຈະ​ລົງ​ຄາ​ຍັກ​ຜູ້ນຳທ່ຽວ ຈະ​​ແນະນຳ​ ແລະ ​ສອນ​ວິທີ​ການ​ລ່ອງ​ໃຫ້​ຢ່າງ​ຖືກ​ວິທີ ພ້ອມ​ທັງ​ສອນການ​ຊ່ວຍ​ເຫຼືອຕົນ​ເອງ​ໃນ​ເວລາ​ເຮືອ​ຂວ້ຳ​ ແລະ ​ບອກ​ຈຸດ​ແວ່​ພັກ​ຕ່າງໆ ​ໃນ​ລະຫວ່າງ​ກາງ​ທາງ.

ການ​ລ່ອງ​ຄາ​ຍັກ​ແມ່ນ້ຳຊອງມີ​ໄລ​ຍະ​ທາງ​ປະມານ 20 ກິ​ໂລ​ແມັດ ​ໃນ​ຊ່ວງ​ທຳ​ອິດ ​ເປັນ​ເສັ້ນທາງ​ຊົມ​ທຳ​ມະ​ຊາດ​ສອງ​ຝັ່ງ​ແມ່ນ້ຳ ຍັງ​ບໍ່​ມີ​​ແກ້ງ​ໃຫຍ່ໆ ​ໃຫ້​ຄວາມ​ຮູ້​ສຶກຕື່ນ​ເຕັ້ນປາ​ນ​ໃດ ຈາກ​ນັ້ນຈະ​​ເຖິງ​ບ່ອນ​ພັກ​ບໍລິ​ເວນ​ປາກ​ຖ້ຳຊ້າງ ​ເຊິ່ງນອກ​ຈາກ​ຈະ​ໄດ້​ແວ່​ພັກ​ຮັບ​ປະທານ​ອາຫານ​ແລ້ວ ຈະ​ໄດ້​ທ່ຽວ​ຊົມ​ບັນດາ​ຖ້ຳ​ໃນ​ບໍລິ​ເວນ​ນີ້ອີກ ບໍ່​ວ່າ​ຈະ​ເປັນ​ຖ້ຳຊ້າງ ​ຖ້ຳຫຼຸບ ​ຖ້ຳຫອຍ ​ແລະ ​ຖ້ຳນ້ຳ ​ຈາກ​ນັ້ນລ່ອງ​ຕໍ່​ໄປ​ຍັງ​ບໍລິ​ເວນ​ຖ້ຳ​ນອນ ນັບ​ເປັນ​ຈຸດ​ແວ່​ພັກ​ອີກ​ແຫ່ງໜຶ່ງທີ່​ຄົນສ່ວນ​ຫຼາຍ ​ເພາະ​ເປັນ​ຈຸດ​ຫ້ອຍ​ໂຫນ​ໂຕນ​ນ້ຳ​ເຮ​ຮາ ​ເຊິ່ງຖ້າ​ລີລາ​ຂອງ​ໃຜ​ງາມ​ຈະ​ໄດ້​ຮັບ​ສຽງ​ຕົບ​ມື​ ແລະ ​ຮ້ອງ​ໂຮ​ເປັນ​ລາ​ງວັນ ນອກ​ຈາກ​ນີ້ ຍັງ​ມີ​ຮ້າຍ​ຂາຍ​ເຄື່ອງ​ດື່ມ​ໃຫ້​ບໍລິການ​ແບບ​ເປັນ​ຊຸ້ມ​ອີກ​ຫຼາຍ​ແຫ່ງ.

ຈາກ​ຖ້ຳ​ນອນ​ປະມານ 5 ກິ​ໂລ​ແມັດ ​ເປັນ​ເສັ້ນທາງ​ຊ່ວງ​ສຸດ​ທ້າຍ​ທີ່​ທ່ານ​ຈະ​ໄດ້​ສຳ​ຜັດ​ກັບ​ແກ້ງ​​ເລັກ​​ແກ້ງ​ນ້ອຍ​ ແລະ ​ບັນຍາກາດ​ອັນ​ງົດ​ງາມ​ຂອງ​ສາຍ​ນ້ຳຊອງ​ ແລະ ​ເມືອງ​ວັງ​ວຽງ ​ເຊິ່ງ​ເມື່ອ​ເຖິງ​ບໍລິ​ເວນ​ຕົວ​ເມ​ືອງວັງ​ວຽງ ​ຜູ້ນຳທ່ຽວ ຈະ​ພາ​ທ່ານ​ເຂົ້າຝັ່ງ ບໍລິ​ເວນຖາວອນ​ສຸກຣີສອດ ​ເປັນອັນ​ສິ້ນສຸດ​ການ​ປະຈົນ​ໄພ​ເທິງ​ສາຍ​ນ້ຳຊອງ ສາຍ​ນ້ຳ​ແຫ່ງ​ຕຳນານ​ທີ່​ພ້ອມ​ຈະ​ສ້າງ​ເລື່ອງ​ລາວ​​ແຫ່ງ​ຄວາມ​ສຸກ​ໃຫ້​ແກ່​ຜູ້​ມາ​ຢ້ຽມ​ຢາມ​ເມືອງ​ວັງ​ວຽງ​ແຫ່ງ​ນີ້.

ລ່ອງ​ກົງ​ເບັງ​ເທິງ​ສາຍ​ນ້ຳຊອງ

ຈຸດ​ເດັ່ນຂອງ​ແມ່ນ້ຳຊອງ​ບໍ່​ໄດ້​ມີ​ຄວາມ​ສະໜຸກສະໜານ​ໃຫ້​ພຽງ​ລ່ອງ​ເຮືອ​ຄາ​ຍັກ​ເທົ່າ​ນັ້ນ, ​ເທິງ​ສາຍ​ນ້ຳ​ແຫ່ງ​ນີ້ຍັງ​ມີ​ກິດຈະ​ກຳ​ສະບາຍໆ ​ເຊັ່ນ​: ລ່ອງ​ກົງ​ເບັງ​ໃຫ້​ທ່ານ​ໄດ້​ນອນ​ເອກ​ເຫຼກຢູ່​ເທິງ​ກົງ​​ເບັງ​ໃຫຍ່ໆ ​ແບບ​ຫຼັງສູ້​ນ້ຳ ໜ້າສູ່ທິວທັດ ​ໂດຍ​ທີ່​ທ່ານ​ສາມາດ​ຕິດ​ຕໍ່​ສອບ​ຖາມ​ໄດ້​ທີ່​ເຄົາ​ເຕີ​ທົວທົ່ວ​ໄປ​ພາຍ​ໃນ​ຕົວ​ເມືອງ​ວັງ​ວຽງ. ​ ເຖິງ​ແມ່​ນກິດຈະ​ກຳ​ລ່ອງ​ກົງ​ເບັງ​ໃນ​ລຳ​ນ້ຳຊອງ​ຈະ​ສ້າງ​ລາຍ​ໄດ້​ ໃຫ້​ແກ່​ເມືອງ​ວັງ​ວຽງ​ບໍ່ໜ້ອຍ​ໃນ​ແຕ່​ລະມື້ ​ແຕ່​ທ່ານ​ອາດ​ຈະ​ບໍ່​ຮູ້​ມາ​ກ່ອນ​ວ່າ​ກິດຈະ​ກຳ ​ທີ່​ຫຼາຍຄົນ​ມັກ​ນີ້ມີຕົ້ນກຳ​ເນີ​ດມາ​ຈາກ​ພວກ​ເດັກ​ນ້ອຍ ທີ່​ມັກ​ຈະ​ພາ​ກັນ​ເອົາ​ກົງ​ເບັງ​ຢູ່​ເຮືອນ​ໃຜ​ເຮືອນ​ລາວ​ອອກ​ມາ​ລ່ອງ ​ເມື່ອ​ນັກ​ທ່ອງ​ທ່ຽວ​ຕ່າງ​ປະ​ເທດ​ເຫັນ​ແລ້​ວສົນ​ໃຈ ​ແລະ ​ທົດ​ລອງ​ລ່ອງ​ຫຼິ້ນນຳ​ພວກ​​ເດັກ​ນ້ອຍ ​ແລ້ວມີ​ການ​ບອກ​ຕໍ່​ກັນ​ໄປ​ຈົນ​ກາຍ​ມາ​ເປັນ​ກິດຈະ​ກຳ​ທ່ອງ​ທ່ຽວ​ຂອງ​ເມືອງ​ວັງ​ວຽງ​ໄປ​ໃນ​ໂຕ.

ຈາກ​ຕົວ​ເມືອງ​ຜູ້ນຳທ່ຽວ ຈະ​ພາທ່ານ​ພ້ອມ​ກັບ​ແບກກົງ​ເບັງ​ຂຶ້ນລົດ​ເພື່ອ​ໄປ​ສົ່ງ​ທີ່​ຈຸດ​ເລິ່ມຕົ້ນຂອງ​ການ​ລ່ອງ ​ເຊິ່ງ​ໄກ​ຈາກ​ຕົວ​ເມືອງ​ວັງ​ວັງ​ວຽງ 4 ກິ​ໂລ​ແມັດ ສ່ວນ​ຫຼາຍນິຍົມ​ລ່ອງ​ເປັນ​ຄູ່ ຫຼື ໝູ່ຄະນະ ​ເພາະ​ຈະ​ສ້າງ​ສຽງ​ຫົວ​ແລະ ​ມ່ວນ​ຊື່ນ​ຫຼາຍກວ່າ​ລ່ອງ​ຄົນ​ດຽວ, ຈຸດ​ແວ່​ເຊົາ​ແມ່ນ ບໍລິ​ເວນ​ຖ້ຳ​ນອນ​ຈຸດ​​ໂດດ​ນ້ຳ​ເຊັ່ນ​ດຽວ​ກັນ​ກັບ​ກິດຈະ​ກຳ​ລ່ອງ​​ເຮືອ​ຄາ​ຍັກ.

ຈາກ​ຈຸດ​ແວ່​ພັກ​ຖ້ຳນອນ​ລ່ອງ​ລົງ​ຕາມ​ກະ​ແສນ້ຳລົງ​ມາ​ຍັງ​ຕົວ​ເມືອງ​ວັງ​ວຽງ ທ່າ​ນຈະ​ໄດ້​ຊົມ​ບັນຍາກາດ​ອັນ​ສວຍ​ງາມ​ເປັນ​ໄລ​ຍະ​ສຸດ​ທ້າຍ ຈາກ​ນັ້ນປາຍ​ທາງ​ທ່ານ​ຈະ​ຕ້ອງ​ຂຶ້ນທີ່​ບໍລິ​ເວນ​ຖາວອນ​ສຸກຣີສອດ ຈາກ​ນັ້ນຈະ​ມີ​ລົດ​ມາ​ຮັບ​​ກົງ​ເບັງ ​ແຕ່​ບາງ​ແຫ່ງ​ທ່ານ​ຕ້ອງ​ໄດ້​ເອົ​າກົງ​ເບັງ​ໄປ​ສົ່ງ​ເຂົາ​ທີ່​ເຄົາ​ເຕີ​ທົວ.


ຊົມ​ຖ້ຳງາມ​ໃນ​ວັງ​ວຽງ

ເມືອງ​ວັງ​ວຽງ​ນອກ​ຈາກ​ຈະ​ເປັນ​ເມືອງ​ທີ່​ສວຍ​ງາ​ມທີ່​ຖືກ​ໂອບອ້ອມ​ດ້ວຍ​ໜ່ວຍພູ​ແລະ​ຜາ​ຫິນ​ອັນ​ສະຫຼັບຊ້ອນ​ ພ້ອມ​ທັງ​ສາຍ​ນ້ຳຊອງ​ທີ່​ແສນ​ງາມ​ແລ້ວ ຍັງ​ມີ​ຖ້ຳທີ່ໜ້າທ່ອງ​ທ່ຽວ​ຈຳນວນ​ຫຼວງຫຼາຍ ​ເຊັ່ນ ຖ້ຳຈັງ, ຖ້ຳຊ້າງ, ຖ້ຳຫອຍ, ຖ້ຳພູ​ຄຳ, ຖ້ຳນ້ຳ, ​ຖ້ຳນອນ ​ແລະ​ຜາຕັ້ງ. ຖ້ຳຈັງ​ຕັ້ງຢູ່ ​ໄກ​ຈາກ​ສະໜາມບິນ​ເກົ່າ​ປະມານ 500 ​ແມັດ ​ເພິ່ນ​ຈະ​ເປີດ​ໃຫ້​ເຂົ້າທ່ຽວ​ຊົມ ​ແຕ່​ເວລາ 8:00 ​ 17:00 ​ໂມງ. ​ເປັນ​ຖ້ຳ​ແຫ່ງ​ດຽວ​ທີ່​ມີ​ໄຟຟ້າ​ຕິດ​ຕັ້ງຢູ່​ພາຍ​ໃນ​ຖ້ຳ, ​ໃນ​ອະດີດ​ປະ​ຊະ​ຊາ​ຊົນ​ເຊື່ອ​ວ່າ​ຖ້ຳ​ແຫ່ງ​ນີ້​ເປັນ​ຖ້ຳສັກສິດ ຖ້າ​ໃຜ​ເຮັດ​ສິ່ງ​ທີ່​ບໍ່​ດີ​ບໍ່ງາມ​ໃນ​ຖ້ຳຈະ​ເກີດ​ອາການ​ຈັງ ​ເຊິ່ງອາການ​ຈັງ​ໄດ້​ກາຍ​ມາ​ເປັນ​ຊື່ວ່າ “ຖ້ຳຈັງ”.

ຈາກ​ທາງ​ເຂົ້າຖ້ຳຈັງຣີສອດ​ທ່ານ​ຈະ​ຕ້ອງ​ໄດ້​ເສ​ຍຄ່າສະຖານ​ທີ່ 1,000 ກີບ​ຕໍ່​ຄົນ​ ຈາກ​ນັ້ນບໍລິ​ເວນ​ສະຖານ​ທີ່​ຈອດ​ລົດ​ທ່ານ​ຈະ​​ເຫັນ​ຂົວ​ສີ​ແສດ​ສົດ​ໃສ​ເສ​ັ້ນທາງ​ສູ່​ຖ້ຳຈັງ ​ເຊິ່ງສາມາດ​ແວ່​ຊົມ​ວິວ​ແມ່ນ້ຳຊອງ​ໄດ້​ດີ​ ​ແລະ ​ຈາກ​ຈຸດ​ນີ້ທ່ານ​ຈະ​ເບິ່ງ​ເຫັນ​ປາກ​ຖ້ຳຈັງຢູ່​ບໍລິ​ເວນ​ກາງ​ປ່າ​ທາງໜ້າ ຖ້າ​ທ່ານ​ຊິ​ຂຶ້ນ​ໄປ​ທ່ຽວ​ຊົມ​ຕ້ອງ​ຊື້ປີ້ປະມານ 5,000 ກີບ​ຕໍ່​ຄົນ ຈາກ​ນັ້ນຕ້ອງ​ອອກ​ແຮງ​ຂຶ້ນຂັ້ນ​ໄດ 147 ຂັ້ນ ​ເຊິ່ງທາງ​ຂ້າງ​ເທິງ​ນັ້ນມີ​ວິວທີ່​ງາມໆ​ຂອງ​ຂົວ​ ແລະ​ ເມືອງ​ວັງ​ວຽງ​ໃຫ້​ໄດ້​ເບິ່ງ​ເປັນ​ລາງ​ວັນ​ສຳລັບ​ຄົນ​ອົດ​ທົນ​ຂຶ້ນຂັ້ນ​ໄດ ນັບ​ວ່າ​ເປັນ​ຈຸດ​ຊົມ​ວິວທິວ​ທັດ​ທີ່​ສວຍ​ງາມ​ທີ່​ສຸດ​ຂອງ​ເມືອງ​ວັງ​ວຽງ​ອີກ​ດ້ວຍ.

​ເມື່ອ​ເຂົ້າ​ໄປ​ພາຍ​ໃນ​ຖ້ຳຈັງ​ທ່ານ​ຈະ​ໄດ້​ສຳ​ຜັດ​ກັບ​ອາກາດ​ເຢັນ​ສະບາຍທ່າມກາງ​ຫີນ​ຍ້ອຍ​ຫີນ​ງອກອັນ​ງົດ​ງາມ​ທີ່​ສຸດ ​ເມື່ອ​ມີ​ແສງ​ໄຟຟ້າ​ສາດ​ສ່ອງ​​ເກີດມີ​ສີ​ສັນ​ເປັ່ງປະກາຍ ​ເຮັດ​ໃຫ້​ພາຍ​ໃນ​ເບິ່ງ​ລຶກລັບ​ຄື​ດັ່ງ​ເມືອງ​ໃນ​ເທບ​ນິຍາຍ​ທີ່​ມີ​ສະ​ເໜ່ຊວນຫຼົງ​​ໄຫຼ ​ໂດຍ​ທ່ານ​ສາມາດຍ່າງ​​ເລາະ​ຊົມ​ໄດ້​ຕາ​ມທາງ​ຊີ​ມັງ​ທີ່​ເຮັດ​ໄວ້​ຢ່າງ​ດີ ​ແລະ ​ຖ້າ​ຍ່າງ​​ໄປ​ທາງ​ຊ້າຍ​ສຸດ​​ເສັ້ນທາງ​ຈະ​ພົບ​ກັບ​ຈຸດ​ຊົມ​ວິວທີ່ສວຍ​ງາມ​ບໍ່​ນ້ອຍໜ້າບໍລິ​ເວນ​ປາກ​ທາງ​ເຂົ້າຖ້ຳ. [[ຮູບ:]]