ນໍ້າຕົກຫ້ວຍລືສີ
ຕາດຫ້ວຍລືສີ ເປັນຕາດທີ່ມີນ້ຳໄຫລລົງມາຈາກຮ່ອມຫ້ວຍຫລາຍສາຍປ່ອງລົງໃສ່ສາຍດຽວ, ສ່ວນໃຫຍ່ກໍ່ແມ່ນນ້ຳທີ່ໄຫລມາຈາກຕີນພູທາງເບືອງ ທິດຕາເວັນອອກຂອງຄ້າຍທະຫານກອງພົນທີ 5, ແລ້ວລອດ ຂົວຜ່ານທາງເລກທີ 13 ໃຕ້ຂອງບ້ານຫລັກ 12, ເປັນຫ້ວຍທີ່ມີນ້ຳໄຫລຕະຫລອດປີ, ຕາດດັ່ງກ່າວແມ່ນພວມໄດ້ຮັບການບູລະນະ, ປົວແປງ ນັບແຕ່ເສັ້ນທາງ ເຂົ້າຈົນຮອດນ້ຳຕົກປະມານ 4 ກວ່າກິໂລແມັດ ເປັນເສັ້ນທາງດິນແດງ ແລະ ສະຖານທີ່ພັກເຊົາກໍ່ເປັນຕູບມຸງດ້ວຍຫຍ້າປະມານ 10 ກວ່າຕູບ ເພື່ອໃຫ້ນັກທ່ອງທ່ຽວໄດ້ພັກເຊົາຕາມສະ ບາຍ, ທັງຫມົດນີ້ເປັນການສຳປະທານຂອງໂຮງງານປຸງແຕ່ງໄມ້ເສີດໄຊ ບ້ານຫລັກ 12 ນີ້ເອງ ເຊິ່ງເພິ່ນໄດ້ເຫັນຄວາມສຳຄັນຂອງການປົກປັກຮັກສາແຫລ່ງທ່ອງທ່ຽວແລະສິ່ງແວດລ້ອມ ໃຫ້ມີຄວາມສວຍງາມ, ຕາດດັ່ງກ່າວ ພວມເປັນທີ່ຮູ້ຈັກຂອງນັກທ່ອງທ່ຽວທີ່ມາຈາກທຸກສາລະທິດນັບມື້ນັບເພີ່ມຂຶ້ນ ສະຖານທີ່ນີ້ໄດ້ກາຍເປັນບ່ອນພັກຜ່ອນຂອງຜູ້ທີ່ມາທ່ຽວຊົມໄດ້ໃນທຸກໆຍາມ, ນັກທ່ອງທ່ຽວ ຫລື ຜູ້ຄົນມັກມາຫລາຍກວ່າຫມູ່ແມ່ນງານບຸນປະເພນີ, ບຸນປະຈຳປີ, ບຸນປີໃຫມ່ແມ່ນຫລາຍເປັນພິເສດຜູ້ຄົນສ່ວນໃຫຍ່ມັກອາບນ້ຳ, ນັ່ງລົມກັນຕາມໂງ່ນຫີນ ແລະ ຍ່າງເລາະປ່າໃນເຂດບໍລິເວນອ້ອມຮອບທີ່ມີປ່າໄມ້ແປກ ແລະ ຕົ້ນຍາງເປັນສ່ວນຫລາຍ, ສາຍນ້ຳທີ່ໄຫລມາຕາມຫ້ວຍ ແລະ ໄຫລໂຮມກັນເປັນອ່າງຂະຫນາດໃຫຍ່ທາງຕອນເທິງກ່ອນມັນຈະແຍກເປັນສາຍຕົກຕາມຜາຫີນເປັນຊັ້ນໆ, ແຕ່ສິ່ງສຳຄັນຢູ່ທີ່ກ້ອງຜາຫີນນັ້ນຈະມີພະພຸດທະຮູບນ້ອຍເກືອບ 10 ອົງເປັນພະພຸດທະຮູບເກົ່າແກ່ບູຮານ, ຊາວບ້ານໃຫ້ຄວາມເຊື່ອຖື.
ພໍ່ໃຫຍ່ທີ່ເປັນສາລະວັດ ພາຍໃນບ້ານທ່ານຫນຶ່ງໄດ້ເລົ່າສູ່ຟັງວ່າ: ທີ່ມາຂອງຕາດລືສີມີເລື່ອງເລົ່າຂານກັນມາວ່າ: ສະຖານທີ່ແຫ່ງນີ້ເປັນບ່ອນບຳເພັນພາວະນາຂອງພະລືສີ ແຕ່ຕອນນີ້ຍັງມີພຽງແຕ່ພະພຸດທະຮູບອົງນ້ອຍຫລາຍອົງ ເຂົາເຈົ້າເອີ້ນວ່າເປັນພະພຸດທະຮູບລືສີບັນຈຸຢູ່ກ້ອງພະລານຫີນບ່ອນນ້ຳຕົກແຫ່ງນີ້, ປະຊາຊົນພາຍໃນບ້ານກໍ່ໃຫ້ຄວາມເຄົາລົບບູຊາ, ເຊື່ອຖືເປັນພະພຸດທະຮູບທີ່ຄົງເປັນຫລັກບ້ານຕັ້ງແຕ່ໃດມາໃນຍາມບຸນ ສິນກິນທານຕ່າງໆ ຫລື ງານບວງສວງຕາມປະເພນີກໍ່ໄດ້ສັກກາລະບູຊາ, ປະຕິບັດກັນມາທຸກໆປີ ຜູ້ຄົນທີ່ກາຍໄປມາກໍ່ ມັກຈະມານົບຂາບ ເພື່ອເປັນສິລິມຸງຄຸນໃຫ້ແກ່ຕົນເອງ ແຕ່ພໍມີບໍລິສັດຕ່າງປະເທດເຂົ້າມາລົງທຶນປູກຢາງພາລາ ແລະ ຕົ້ນໄມ້ຊະນິດດີໆ, ເຮັດໃຫ້ການບຸກເບີກປ່າເຫລົ່ານີ້ກາຍເປັນທົ່ງຫົວ ລ້ານຈົນຫມົດ, ຝູງສັດປ່ານາໆຊະນິດກໍ່ບໍ່ຄ່ອຍຈະມີໃຫ້ເຫັນຄືແຕ່ກ່ອນອີກ.